2018 senesi ilk yaz (iyün) 19 künü Ukraina Prezidenti Petro Poroşenko Birleşken Milletler Teşkilâtınıñ Baş kâtibi Antoniu Guterriş ile telefon vastasınen subet keçirdi. Petro Poroşenko Baş kâtipke vaqtınca işğal etilgen Qırımda insan aqları saasında vaziyet kerginleşkeni sebebinden raatsızlanğanını bildirdi.
2018 senesi ilk yaz (iyün) 20 künü Ukraina Prezidenti Petro Poroşenko Latviya Cumhuriyetiniñ Tışqı işler Naziri Edgars Rinkeviçsni qabul etti. Prezident Latviyağa Ukrainanıñ mustaqilligine ve territorial bütünligine daima qol tutqanı, rusiye istilâsına qarşılıq köstermege yardım etkeni, Qırımnıñ işğalini takbih etip tanımağanı içün öz teşekkürini bildirdi.
Latviya Avropa Birligi tarafından Rusiyege qarşı qabul etilgen sanktsiyalarğa Ukrainanıñ Qırım ile birlikte territorial bütünligi tiklenmesine qadar izçen surette qol tutqanına Devletniñ Başlığı yüksek qıymet kesti. Latviyanıñ Tışqı siyaset idaresiniñ yolbaşçısı ukrain siyasiy mabuslarnı rusiye apishanelerinden azat etmek içün faal halqara kampaniya kerek olğanını qayd etti.