2018 senesi arman ayı (avgust) 17 künü Ukraina Prezidentiniñ Qırım MC Daimiy Temsilcisi fizikiy ve uquqiy şahıslarğa qarşı sıñırlayıcı tedbirlerni (sanktsıyalarnı) amelge keçirüvnen, bu cümleden, işbu şahıslarnıñ Ukraina topraqlarında bulunğan mülkiyetni tosmenge tutuvnen, menfaatları olğan şahıslar tarafından Ukraina milliy havfsızlıq ve müdafaa Şurasınıñ qararları ve Ukraina Prezidentiniñ mütenasip emirleri ile pekitilgen işbu sanktsıyalarnı bozmaq ve körmemezlikke urmaq teşebbüslerine qarşılq kösterüvnen bağlı areketlerni uyğunlaştıruv boyunca iş muşaveresini keçirdi.

Muşaverede Ukraina havfsızlıq Hızmeti Qırım MC Baş idaresiniñ, Ukraina havfsızlıq Hızmeti Herson vilâyetinde Baş idaresiniñ, Ukraina devlet sıñır Hızmeti Azaq-qaradeñiz regional idaresiniñ, Ukraina naqliyat havfsızlığı Qaradeñiz regional idaresiniñ, ‘‘Ukraina deñiz limanları memuriyeti’’ devlet müessisesiniñ ve başqa teşkilâtlarniñ vekilleri iştirak etti.

Muşaverede sanktıyalarnı amelge keçirüv ve mükemmelleştirüv boyunca vekâletli merkeziy akimiyet organları tarafından qabul etilgen umumiy qararlarını yerine ketirüv vastaları muzakere etildi. Ukraina Prezidenti 2018 senesi qural ay (mayıs) 14 künü imzalağan ‘‘Sanktsıyalar aqqında’’ № 126/2018 emiri boyunca sanktsıyalar cedvelinde bulunğan Rusiye şirketine ait olıp, RF bayrağı altında yaldağan ‘‘Mehanik Pogodin’’ gemisi ile bağlı adisege ayırca diqqat celp etildi. Ekologiya ve gemicilik havfsızlığı saalarını nezaret etken vekâletli devlet organlarnıñ vekillerini öz gemisine kirsetmegen kapitannıñ areketlerine ameldeki qanuniyet çerçivesinde qıymet kesüv, böyle vaziyette istilâci devletke boysunğan teşkilâtlar tarafından olması mümkün provokatsıyalarğa qarşılıq kösterüv yolları muzakere etildi.