2018 senesi berim (sentâbr) ayı 18 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Ukrainanıñ vaqtınca işğal etilgen Qırım toprağınen poçta vastasınen alâqa yolunı toqtatmaq, sözde ‘‘Qırm poçtası’’ ile çalışqan uquqiy şahıslarğa qarşı sıñırlayıcı tedbirlerni (sanktsıyalarnı) amelge keçirmek ve bu cümleden olarnıñ Ukraina topraqlarında bulunğan mülkiyetlerini tösmenge almaq, nevbetteki areketlerni uyğunlaştırmaq maqsadınen Rusiye poçta hızmetlerınñ yardımı ile çalışqan sözde ‘‘Qırım poçtasınıñ’’ faaliyetini kompleks şekilde semereli uquqiy vastalarnen taqip etüv boyunca idareler arası muşavere keçirdi.

Muşaverede ‘‘Ukrpoştanıñ’’, Ukraina Havfsızlıq Hızmeti Baş idaresiniñ, Ukraina infrastruktura Nazirliginiñ, Ukraina çetel işler Nazirliginiñ, Ukraina Havfsızlıq ve Mudafaa Şurasınıñ ve başqa müessiselerniñ vekilleri iştirak etti.

Böyle meselelerge ayrıca diqqat etildi:

– kompleks şekilde sözde ‘‘Qırım poçtasını’’ ve onınen çalışqan muessiselerni uquqiy ceetten taqip etüv vastalarnı belgilev;

– Ukrainanıñ vaqtınca işğal etilgen Qırım toprağınıñ qıta Ukraina ve çetel devletler ile rusiyeli poçta hızmetleriniñ yardımı ile ve Rusiye Federatsıyası topraqlarında halqara poçta ile deñişüv vastasınen kerçekleşken poçta alâqasını kesmek;

– mektüpleşüv sırı ve malümat saasında insan aq-uquqlarına riayet eterek, halqara teşkilâtlarda vaqtınca işğal etilgen Qırım toprağı ile alâqa boyunca Ukrainanıñ mevamını belgilemek.