Er kün işğal etilgen topraqlarda yaşağan semetdeşlerimiz yarımadanıñ azat etilecegine işançlarını ifadelep, rus işğalcilerine toqtamayıp qarşılıq köstermege devam ete. Er aftalıq #qarşılıq_areketi rubrikamızda adetince Qırımda ukrainlerniñ cesür küreşi ve işğalcilerge qarşılığına dair haberlernen paylaşmağa devam etemiz.  

• Kezlev rayonunıñ sakini Rusiye askerlerini yamanlap, Ukraina Silâlı Quvetlerine yardım etmek istegenini bildirdi. İşğalciler adamnı tutıp aldı, onı kamera ögünde afu soramağa mecbur ettiler, qanunsız “mahkeme” ise “Sovetler Birligini itibardan tüşürgeni” iddiasınen aqayğa 50 biñ ruble cöreme belgiledi.
• 30 yaşındaki Aqyar sakini içtimaiy ağlarda işğalcilerge qarşı zorbalıq areketlerine çağırdı. Adamnı tevqif ettiler, işğalci “mahkeme” ise oña, internet saifeleri ve kanallarnıñ idaresinen bağlı faaliyetini yasaqlap, 1,5 yılğa apis cezası berdi.
• Qarasuvbazar şeeriniñ sakini içtimaiy ağlarda Ukrainağa destek bildirdi. İşğalci telükesizlik quvetleri bu adamğa qarşı “protokol” tizdiler, “dava” materialları ise işğalci “mahkemege” yiberildi.
• “ATEŞ” qarşılıq areketiniñ faalileri Qırımnıñ yalı boyunda işğalci mudafaa noqtalarınıñ sayısı artqanını bildirdi. Faaler ayrıca, işğalciler tarafından dron bazası olaraq qullanılğan “Hersones” uçaq alanında istihbarat yaptılar.
• “Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Böyle etip, Ukrainağa qol tutuv plakatları ve sarı şeritler kene Aqmescit, Aqyar, Bağçasaray ve Kezlev şeerlerinde peyda oldı. Aqmescitte böyle timsallerni Zaharova, Poligonnaya, Sovetskaya ve Beregovaya soqaqlarında körmege mümkün oldı.
• “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete.
• “Zla Mavka” (“Açuvlı Mavka”) qarşılıq areketiniñ faalleri kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege ve öz timsalâtını tarqatmağa devam ete. 

Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açılması da yarımadadaki qarşılıqnıñ artışını köstere. İyülniñ 11-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 847 vaqia qayd etildi. Olar arasında 755 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 10 adise alâ daa baqıla. Cınısqa köre qadınlarğa qarşı 309 (41%), erkeklerge qarşı ise 446 (59%) qarar çıqarıldı. Umumen, berilgen cöremelerniñ umumiy miqdarı endi eñ azdan 23,7 million rus rublesini teşkil ete.

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!