1918 senesi orta küz ayınıñ 14-nde Aqmescitte Tavriya universitetiniñ – Qırım yarımadasındaki ilk ilk lâdiniy universitetniñ – tantanalı açılışı olıp keçti. Onıñ tesis etilmesi Qırımnıñ aliy tasil ve ilmiy ayatınıñ inkişafında müim bir basamaq oldı. 

Universitetni qurmaq ğayesi 1916 senesi peyda oldı. Onıñ teşebbüsçilerinden biri yarımadada aliy oquv yurtunıñ açılmasını istegen cemaat erbabı ve iş adamı Solomon Krım edi. 

1918 senesi baarde, hetman Pavlo Skoropadskıynıñ Ukrayina devleti zamanında, Livadiyada Aziz Volodımır adına Kıyiv universitetiniñ bölügi çalışmağa başladı. Soñra Aqmescitte mustaqil Tavriya universitetiniñ meydanğa ketirilmesi aqqında qarar qabul etildi. 

1918 senesi ilk küz ayınıñ 3-nde Qırım bölge ükümeti universitetniñ tesis etilmesi aqqında qararnı tasdıqladı, orta küz ayınıñ 14-nde ise Tavriya mırzaları teatrı binasında açılış merasimi olıp keçti. 

Yañı qurulğan universitet beş fakultetni birleştirdi: tarihiy-tilşınaslıq, fizikiy-riyaziy, uquqiy, tibbiy ve agronomik. Onıñ ilk rektorı professor Roman Ğelviğ oldı. 1920 senesi universitetni meşur alim Volodımır Vernadskıy – Ukrayina ilimler akademiyasınıñ birinci prezidenti – idare etmege başladı. 

Qıyın siyasiy şaraitke ve bir çoq reorganizatsiyağa baqmadan, universitet Qırımnıñ müim tasil ve ilim merkezi olaraq inkişaf etmege devam etti. 1999 senesi oña milliy status ve Volodımır Vernadskıy adı berildi. 

2014 senesi Rusiye Qırımnı vaqtınca işğal etken soñ universitet Aqmescitteki faaliyetini ukrayin uquqiy alanında devam etmek imkânını coydı. Lâkin ikâyesi bunıñ ile bitmedi. 2016 senesi V. İ. Vernadskıy adına Tavriya milliy universiteti Kıyivde tasil faaliyetini yañıdan başlattı. 

Tarihı Aziz Volodımır adına Kıyiv universitetiniñ bölüginden başlağan universitet, aman-aman bir asırdan soñ, öz faaliyetini Ukrayinanıñ paytahtında devam ettirgeni timsaliy bir şeydir.

Tavriya universitetiniñ tarihı Qırımnıñ tasil ve ilmiy mirası tek binalar ve dershaneler degil de, yarımadanıñ vaqtınca işğaline baqmadan yaşamağa devam etken insanlar, bilgiler ve ananeler olğanını köstere.