2018 senesi ilk yaz ayı (iyün) 26 künü Ukraina Prezidentiniñ Qırım MC Temsilciliginde uquqiy talil ve halqara alâqalar hızmetleriniñ hadimleri Ukraina Esas qanunnıñ 22-yıllığına bağışlanıp, Ukraina Yuqarı Şurasında Qanuncılıq institutı tarafından teşkil etilgen ‘‘Ukrainada ademi merkeziyet ceryanını uquq vastasınen idare etüvniñ havfsızlıq ceeti’’ mevzusında halqara-ilmiy konferentsiyada iştirak ettiler.

Tedbirde Qanuncılıq institutınıñ Müdiri Oleksand Kopılenko, Ukraina Milliy Havfsızlıq ve Mudafaa Şurasınıñ Kâtip muavini Oleksandr Litvinenko, Arbiy quvetlerniñ demokratik nezareti Jeneva merkeziniñ Müdir muavini Filip Fluri, Ordu, konversiya ve silâsızlanuv tedqiqatı merkeziniñ Müdiri Valentın Badrak, Qanuncılıq insitutınıñ hadimleri, alimler ve cemaat teşkilâtlarınıñ vekilleri iştirak etti.

Konferentsiya devamında Ukrainada ademi merkeziyet islâatını uquq ceetten temin etüviniñ vaziyeti ve istiqbali, yerli öz-özüni idare etüv islâatınıñ havfsızlıq ceeti, devlet sıñırınıñ qorçalavı, uquq qorçalavnıñ ve vatandaş qorçalavınıñ temin etilüvi, yerli uquq qorçalav organları saasında ademi merkeziyet kibi meseleler muzakere etildi. Bundan da ğayrı, tedbir çerçivesinde Ukraina milliy havfsızlıq Kontseptsiyasını teşkil etmek ve ademi merkeziyet esnasında milliy havfsızlıq menfaatını qorçalavında çetel tecribesini qullanmaq kerek olğanı da muzakere etildi.

Konferentsiya çerçivesinde Temsilcilikniñ hadimleri vaqtınca işğal etilgen Qırımdan ve deñiz tarafından rusiye istilâsına qarşılıq kösterüv şaraitlerde Herson vilâyetindeki yerli cemiyetlerde ademi merkeziyetniñ şimdiki vaziyetini muzakere ettirdiler. Bu cümleden, Qırımğa yaqın olğan bazı rayonlarda ademi merkeziyet ceryanınıñ suniy şekilde yavaşlatuvınıñ havfsızlıq içün menfiy aqibetleri ve bunınen bağlı telükeler qayd etildi.