2018 senesi fevral 22 künü Novotroyitske qasabasında Ukraina Prezidentiniñ Qırım MC-deki Daimiy Temsilcisi Boris Babinniñ yolbaşçılığında Ukrainanıñ vaqtınca işğal etilgen Qırım topraqlarınıñ aktual meseleleri boyunca iş gruppasınıñ nevbetteki toplaşuvı olıp keçti. Toplaşuvda iş gruppasınıñ azaları, Temsilcilikniñ hadimleri, Novotroyitske rayon devlet memuriyetiniñ ve rayon şurasınıñ yolbaşçıları, Sivaşta yerleşken köy şuralarnıñ reisleri, devlet akimiyeti rayon bölükleriniñ temsilcileri, qırımtatar halqı regional ve yerli meclisleriniñ vekilleri iştirak etti.
Oturış devamında Novotroyitske qasabasında Ukraina vatandaşı pasportlarnıñ resmiyleştirüvinen oğraşacaq Memuriy hızmet merkeziniñ teşkil etilüvi muzakere etildi. Territorial cemiyetlerniñ esabına Memuriy hızmet merkezi içün donatmalar alınğan soñ, merkez 2018 senesiniñ yazına qadar rayonnıñ sakinlerine ve vaqtınca işğal olunğan Qırımda yaşağan Ukraina vatandaşlarına öz hızmetlerini bermege başlaycağı aqqında haber etildi.
Ukraina Devlet migratsiya hızmetiniñ malumatına köre, 2017 senesiniñ devamında Novotroyitske bölüginde Qırım sakinleri içün 4000-den ziyade pasport vesiqaları resmiyleştirildi. Bundan da ğayrı, Novotroyitske qasabasında 2017 senesiniñ devamında Qırım sakinlerine 300-den ziyade doğuv aqqında şeadetname berildi ve 30-den ziyade evlenme qayd etildi.
Daimiy Temsilcisi Memuriy hızmet merkeziniñ imkânlarını keñişletmek içün halqara tehnikiy yardımnı celp etüv meselesi, Merkezniñ çalışıp başlanmasından soñ Temsilcilikniñ iştiragi ile muzakere etilecegini qayd etti. Toplaşuvnıñ iştirakçileri ‘‘Çonğar’’ KÇNN ve Novotroyitske qasabası arasında, bu cümleden, Qırımdan Memuriy hızmet merkezine kelip ketken vatandaşlar içün muntazam rayonara yolcu (avtobus) naqliyatını teşkil etmege kerek olğanı aqqında añlaştılar. Bundan da ğayrı, Novotroyitskiy rayonında memleket içinde mecburen köçken şahıslarnıñ aq-uquqlarına riayet etüv meselesi de muzakere etildi, Novotroyitskiy rayonınıñ vekâletli memurlarına Avropa Şurasınıñ leyhası çerçivesinde azırlanğan ‘‘Ukrainada memleket içinde mecburen köçken şahıslarnıñ aq-uquqlarını quvetlendirüv’’ serlevalı mütenasip metodik qullanma taqdim etildi.
Ayrıca rayonda ekologik vaziyetı meselesi, yani Azaq-Sivaş milliy parkınıñ terkibinde ve vaqtınca işğal olunğan topraqlarnıñ sıñırlarında bulunğan Sivaş limanında canlı suv menbalarıñ qanunsız alda elde etilmesi muzakere etildi. Rayon şurasınıñ ve rayon devlet memuriyetiniñ reberiyeti, Sivaşnıñ civarında yerleşken koy şuralarınıñ başlıqları mütenasip ekologik, havf ve qapaçılıq telükeleri aqqında haber ettiler. Daimiy Temsilci bu meseleler boyunca bir sıra idarelerniñ, bu cümleden, Herson vilâyeti devlet memuriyetiniñ kollegyası seviyesinde tedbirleri ve bu mesele boyunca soñki makeme qararı aqqında ikâye etti.
Daimiy Temsilci yerli akimiyet ve öz-özüni idare etüv organlarnı, qırımtatar halqınıñ meclislerini vaqtınca işğal olunğan topraqlarnıñ sıñırlarında yerleşken Herson vilâyetiniñ rayonlarğa köçeyatqan Ukraina Milliy Politsiyasınıñ Qırım MC ve Aqyar boyunca Baş idareisiniñ Sivaş boyunda faaliyetine qol tutmağa çağırdı.
Oturıştan soñ Daimiy Temsilci Boris Babin Temsilcilikniñ hadimleri ve rayon akimiyetiniñ memurları ile beraberlikte Memuriy hızmet merkezini ziyaret etip, onıñ öğünde qoyulğan meselelerniñ eñ yaqın vaqıtta çezile bileceginde emin oldı.