2018 senesi berim (sentâbr) ayı 19 künü Ukraina Prezidentiniñ Qırım MC Daimiy Temsilcisi Borıs Babin Ukraina Yuqarı Şurasınıñ söz serbestligi ve haber siyaseti boyunca Komitetiniñ oturışında vaqtınca işğal etilgen Qırımda söz serbestiginiñ ve matbuat vastalarnıñ vaziyeti boyunca maruza ile çıqışta bulundı.
Borıs Babin öz çıqışında Qırımda çalışqan ve faaliyetleri içün qanunsız şekilde ukrain radio sıqlıqlarını işletken rusiye teleradioşirketlerge ve olarğa donatuvlarını satmağa devam etken avropalı şirketlerge qarşı sanktsıyalar siyasetini sertleştirmek kerek olğanını qayd etti.
Qırımdan rusiye tele ve radio vastasınen yayınlavnıñ Herson vilâyetine tesir etüvine qarşılıq köstermege kerek olğanı da ayrıca qayd etildi.
Borıs Babinniñ maruzası neticesinde halq deputatlar Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele areket Planınıñ mütenasip vazifelerine ve parlament tarafından kelecekte yapılacaq bir sıra tedbirlerge qol tuttı.
Aynı şu künü Borıs Babin uquq qorçalav organlarnıñ faaliyetini qanuniy ceetten temin etüv boyunca parlament Komitetiniñ oturışında vaqtınca işğal etilgen Qırımda RF cezalayıcı küçleriniñ faaliyeti ve Ukrainanıñ Qırım MC ve Aqyar şeeri boyunca uquq qorçalav organlarınıñ faaliyeti aqqında maruza ile çıqışta bulundı. Temsilcilikniñ ve ukrain uquq qorçalav organlarınıñ bu yönelişte kündelik faaliyeti ve istiqbali muzakere etildi.
Uquq qorçalav organlarnıñ vaqtınca işğal etilgen Qırımğa yaqın olğan topraqlarğa köçürilüvine, anda Ukraina Milliy Gvardiyanıñ qoşma bölüklerini yerleştirüvine ayrica diqqat etildi. Ukraina сinaiy qanuniyetine Roma nizamnamesini qoşulması kerekligi, devlet sırına irişimleri olğan şahıslarğa işğal etilgen topraqlarnı ziyaret etüvni qanuniyet çerçivesinde yasaq etilüviniñ ve işğalciler ile işbirlik içün cezalavnıñ hususiyetleri muzakere etildi.
Maruzanıñ ve onı uquq qorçalav organlarınıñ reberiyeti ile muzakere etüvniñ neticesi olaraq Komitet Temsilcilik tarafından amelge keçirilgen acele tedbirler Planınıñ mütenasip vazifelerine bir ağızdan qol tuttı.