2018 senesi berim ayı (sentâbr) 4 künü Ukraina Prezidentiniñ Qırım MC Daimiy Temsilcisi Borıs Babin Ukraina Yuqarı Şurasınıñ aile, gençlik siyaseti, sport ve turizm boyunca Komitetiniñ oturışında işğal etilgen topraqlarnıñ sakinleri içün evlenüv ceryanını qolaylaştırğan № 8400 qanun leyhasını muzakere etüvde iştirak etti.

Halq deputatları ögünde vaqtınca işğal etilgen Qırımnıñ sakinlerine berilgen memuriy hızmetler ve grajdanlıq vaziyetini qayd etüv saasında uquq qullanuv tecribesi boyunca Borıs Babin yapqan maruza neticesinde halq deputatları 8400 sanlı leyhanı esasqa alıp, oña umumen ve bir ağızdan qol tuttılar.

2018 senesi berim ayı (sentâbr) 4 künü Borıs Babin içtimaiy siyaset, iş ve pensiya ile teminlev boyunca Komitetniñ oturışında Qırımdan köçken şahıslarnıñ ve vaqtınca işğal etilgen yarımadada yaşağan vatandaşlarnıñ emek ve içtimaiy aqlarına riayet etüv vaziyeti ve Temsilcilikniñ bu yönelişte kündelik faaliyeti ve iştiqbali boyunca maruzası ile çıqışta bulundı. Maruza ve Ukraina içtimaiy siyaset Nazirligi vekilleriniñ iştiragi ile olıp keçken muzakere neticesinde Ukrainanıñ vaqtınca işğal etilgen Qırım toprağından rusiye istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarnıñ ve vatandaşlarnıñ aq-uquqlarını qorçalav boyunca 2018-2019 seneleri içün acele areket Planındaki Qırım sakinleriniñ içtimaiy ve emek aqları saasında vazifelerge Komitet bir ağızdan qol tuttı.