2018 senesi saban ayınıñ (mart) 22 künü Ukraina Prezidentiniñ Qırım MC Temsilciligindeki halqara alâqalar ve uquqiy talil hızmetleriniñ baş mesleatçıları «Tışqı siyaset auditı: Ukraina-Latviya» serlevalı cemaat muzakeresinde iştirak ettiler. Tedbirde Latviya Cumhuriyetiniñ Ukrainadaki Vefqulade ve Tolu vekâletli elçisi Yuris Poykans, ‘‘Yañı Avropa’’ merkeziniñ müdir yardımcısı Katerina Zarembo, Latviya halqara işler institutınıñ mutehassısı Elizabete Vizgunova, Latviya Tışqı işler nazirliginiñ Devlet kâtibi Andreys Pildegoviçs, Ukraina Tışqı işler naziriniñ yardımcısı Vasıl Bodnar, Ukraina halq deputatı, Ukraina Yuqarı Şurasınıñ Latviya Cumhuriyeti ile parlamentara alâqalar boyunca gruppanıñ başlığı Oleksandr Kodola, uquq qorçalayıcı taqımlarnıñ ve cemaat teşkilâtlarnıñ vekilleri iştirak etti.

Tedbirde Ukraina ve Latviyanıñ umumiy tarihi, Ukrainanıñ Avropa azaları olğan devletlerinen munasebetleri, devletler arasında tasil, siyasiy ve agrar alâqalar muzakere etildi. Ukraina-Latviya munasebetlerindeki pıtraqlı meseleler beyan etildi, Ukrainanıñ ve bir sıra strategik ceetten muim olğan devletlerniñ ortaq menfaatları baqıldı, Ukrainanıñ faal tışqı siyaseti içün tevsiyeler azırlamaq maqsadınen AB devletlerinde içki islâatlarnıñ keçirilüvinde menfiy ve musbet tecribeleri muzakere etildi. Latviya Tışqı işler nazirliginiñ Devlet kâtibi öz çıqışında Latviya Rusiyeniñ areketlerini takbih etkenini, Qırım yarımadasınıñ qanunsız işğali meselesini bütün halqara meydançıqlarında kötergenini, AB devletlerinde Rusiye propagandasına qarşılıq kösterüv boyunca faaliyet alıp barğanını ve Ukrainağa halqara seviyede qol tutqanını qayd etti.