2026 senesi fevral 22-de Toronto merkeziy meydanında (Kanada) rusiyeniñ Ukrayinağa qarşı cenkiniñ dörtünci yıllığına bağışlanğan miting olıp keçti.

Mitingde Ontario vilâyetiniñ baş naziri, Toronto şeer yolbaşçısı, Kanada parlamentiniñ azaları, Kanadada Ukrayina elçisi Andriy Plahotnük, ukrain cemiyetiniñ liderleri ve qırımtatar faalleri, şu cümleden Kanadada Qırımtatar birleşmesiniñ prezidenti Ruslan Kurt iştirak etti.

Ruslan Kurt çıqışında iştirakçilerge Qırım, qırımtatarlar ve Qırımnıñ rusiye işğaline qarşı 12 yıllıq tirenüvi aqqında hatırlattı.

Tedbir yüzlernen iştirakçini topladı, olar Ukrayina ile birdemligini köstermek, onıñ topraq bütünligine qol tutmaq ve halqara toplulıqqa Qırım sakinleriniñ rusiye işğaline qarşılıq köstergenini hatırlatmaq maqsadınen qoşuldılar.