6 oktâbr künü Ukrayina Tışqı işler nazirliginiñ yardımı ile Ukrayin İnstitutı tarafından teşkil etilgen Halqara medeniy diplomatiya forumı çerçivesinde dünyada ukrain ve qırımtatar tilleriniñ populârlaşması içün “Hvilâ/ Dalğa” mukâfatınıñ ilk taqdimi olıp keçti, mukâfat içün 18 memleketten 44 namzet yarıştı.

Açılış sözünen Ukrayina tışqı işler naziri Andriy Sıbiğa, Ukrayin İnstitutınıñ müdir muavini Alim Aliyev, Qırımtatar Milliy Meclisiniñ reisi Refat Çubarov ve mukâfatlar jüri reisi, “Lvivska politehnika” Milliy universitetiniñ Tasil, medeniyet ve diasporanen alâqalar halqara institutınıñ müdiri İrina Klüçkovska çıqışta bulundılar.

Merasimni alıp barıcı Vadımm Karpyak ve jurnalist Gulsum Halilova alıp bardılar.

Öz çıqışında Andriy Sibiğa, qırımtatar tiliniñ desteklenmesiniñ müimligini köstermek içün bu mukâfatnıñ teşkil etilmesiniñ emiyetini qayd etti.

“Bugünki kerçeklerde ukrayin ve qırımtatar medeniyetiniñ pekitilmesi – bizim tamırımız ve kimligimizniñ pekitilmesidir, til ise bu kimlikniñ temelidir”.

Alim Aliyev ukrayin ve qırımtatar medeniyetine ses bergen, tilni inkişaf ettirgen, tercimeler yapqan, kitaplar bastırğan, muzıka ve kino yaratqan insanlarnıñ sayısı yıl yıldan artqanını qayd etti.

“İnsanlar ukrayin ve qırımtatar sözüni dünyağa ketirmeleri içün elimizden kelgenini yapamız”.

İrina Klüçkovska, soñki yılları dünyada ukrayin tilinde laf etilmesi, ukrayin tiliniñ mekteplerde, ilmiy merkezlerde, arbiy bölüklerde, dünya sahnelerinde eşitilmesi içün ğayret köstergen bütün ukrayinlerniñ – arbiylerniñ, ocalarnıñ, göñüllilerniñ, medeniyet erbaplarınıñ rolüni qayd etti.

Refat Çubarov yıllarnen devam etken repressiyalardan soñ qırımtatar tiliniñ ğayrıdan tiklenmesi qıyın olğanını qayd etti. Hususan, o, qırımtatar tiliniñ ğayrıdan tiklenüvinde devletniñ qoşqan issesini ve tilniñ latin urfatına qaytarılmasınıñ müimligini qayd etip, işğal etilgen Qırımda Rusiyeniñ qırımtatar tiliniñ öğretilmesine imkân bermegenini qoştı.

“Ukrayina devlet tiliniñ inkişafı ve işletilmesi, Ukrayina tamır halqlarınıñ tilleriniñ inkişafı – bu, kerçekten de, yapqanımıznıñ qorçalavına doğrultılğan areketlerdir. O, epimizniñ qalqanıdır ve onı qorçalağance yaşaycaqmız”.

Mukâfatnıñ birinci laureatları:

• Marta Yenkala — London Universiteti kollecinde ukrain tili ocası;
• Nariye Seydametova — İstanbul Universitetinde qırımtatar tili ocası.

Merasimniñ soñunda “Kıyivska kamerata” orkestri çıqışta bulundı.