Aprelniñ 22-nde Odesa şeerinde “Qırım ve yaşlar: metanet usulları, birlik degerlikleri” cemaat munaqaşası olıp keçti. Tedbir, Temsilcilikniñ kognitiv deokupatsiya ve yaşlar yönelişiniñ inkişafı boyunca Şura tarafından teşebbüs etilgen muzakerelerniñ bir qısmı oldı. Bundan evel bunıñ kibi seminarlar Kıyiv ve Poltava şeerlerinde ötkerilgen edi.

Tedbirde 40-tan ziyade genç – mektep talebeleri, studentler, cemaat teşebbüsleriniñ vekilleri ve genç faaller iştirak etti. Muzakereler, tek mütehassıslarnıñ çıqışlarını diñlemek içün degil de, öz baqışları, kelecekte olğan stsenariyler ve esas meselelerge ortaq cevaplarnı şekillendirmek içün imkân bergen interaktiv seminar formatında keçti.

İştirakçilerniñ gruppaları, Sovet akimiyeti tarafından yoq etilgen tarihiy Qırım toponimleri, şu cümleden, Aqmescit, Canköy, Kezlev ve Alupka adlarınen adlandırıldı, bunıñ maqsadı Qırım yarımadasınıñ şeer adlarını kelecekte Qırımnıñ kimliginiñ bir parçası olaraq köstermek edi.

Tedbir iştirakçilerine açılış sözünen Temsilcilikniñ informatsion teminlev bölüginiñ müdiri Yevğen Bondarenko muracaat etti. Onıñ qayd etkenine köre, Qırımnıñ azat etilmesinden soñ ğayrıdan quruv içün vektornı belgileycek areket etici küç – bu gençlerdir.

“Qırım meselesini yaşlar arasında aktualleştirmege kerek, çünki Ukrainanıñ gençleri kelecekte Ukraina devletiniñ deñişüv ve inkişafınıñ temelidir. Bugün Qırım aqqında, onıñ tarihı, çağıruvlar aqqında söz yürsetemiz ve, elbette, bizim ortaq noqtalarımız aqqında”, – dep qayd etti Yevğen Bondarenko

Öz maruzasında turğunlıq, havfsızlıq ve strategik kommunikatsiyalar boyunca halqara ekspert Dmıtro Teperik iştirakçilerge Qırımnıñ kelecegine bir qaç küçniñ ortaq areket alanı olaraq baqmağa teklif etti: tarihiy “yük”, bugünki “itevler” ve transformatsiya yönelişinde istenilgen “çeküvler”. Vaziyetniñ mürekkepligine diqqat ayırıp, er kelecekniñ em absurd, em de mümkün olabilecek ya da kerçekke yaqın inkişaf yolları olğanını añlattı.

“Ukrain ve avropalılarnıñ yaş nesilleri umumiy kelecegimizniñ istenilgen variantını, şu cümleden Qırımnıñ Ukrainağa ve Avropa demokratik alanına integratsiyasını muzakere etmeli”, – dep qayd etti Dmıtro Teperik.

Ukraina mustaqil siyasiy tedqiqatlar merkeziniñ şura reisi, Milliy dayanıqlıq ve birdemlik platformasınıñ tesisçisi Yuliya Tişçenko çıqışta bulunıp, Ukrainanıñ farqlı regionlarından kelgen gençler arasında sıñırlı bağlarnıñ pekitilmesinde – ilk evelâ kelecekte bölünmelerniñ ögüni almasında medeniyet ve tasilge ayrı diqqat ayırdı.

“Ukraina gençleri Qırım aqqında, işğal şaraitlerinde yaşayış aqqında aktual bilgilerge muhtac. Ukrainada gençlerniñ Qırımnen bağlı şahsiy ikâyeleri çoqusı allarda eksik. Ve bunı deñiştirmek, Qırımdaki vaziyetni añlamağa tırışmaq mantıqlıdır. Çünki bu bizim umumiy kelecegimiz, Ukraina cenübiniñ telükesizligi, siyaseti, iqtisadiyatı. Ve kognitiv işğalden azat etüv – tamam bu kibi yanaşuvlarnı, Qırım yarımadasınıñ sözde Rusiyenen bağlı keçmişi aqqında rus añlatuvlarnıñ yoq etilmesini maqsat tuta”, – dep qayd etti Yuliya Tişçenko.

Tarihçı, tarihiy ilimler namzeti, “Kiyev-Mogilân akademiyası” Milliy universitetiniñ ocası, “Qırım studiyaları” ilmiy merkeziniñ reberi Martin-Oleksandr Kıslıy tarihiy bir lektsiyanı taqdim etti. Tarihiy faktlarğa esaslanıp, o, Rusiye imperatorlıq siyasetçileri qırımtatar, ukrain ve qaray medeniyet qatlamlarını ardı-sıra sıqıştırıp, olarnı Rusiye imperatorlığı añlatuvlarınen deñiştirgenini añlattı.

“Qırımnıñ tarihı – Ukrainanıñ tek keçmişini degil de, bugüni ve kelecegini añlamaq içün anahtardır. Çünki Rusiyeniñ Ukrainağa qarşı şimdiki cenki, tecavuzcınıñ eki asırlıq müstemlekeciliginiñ aqibetidir”, – dep yekünledi Martin-Oleksandr Kıslıy.

Tarihçı Rusiye tarihiy mifleriniñ alâ daa öz tesirini saqlap qalğanına ve hususan Ğarpta tarqalğanına gençlerniñ diqqatını celp etti.

Gruppalarda çalışıp, iştirakçiler işğal altındaki Qırımnıñ meselelerini muzakere ettiler ve onıñ barışıq kelecegi içün strategiya şekillendirdiler. Gençler, propaganda tesiri, tasil zayıflaması, rusiyeden köçip kelgenler sebebinden demografik deñişmeler ve ukrain ile qırımtatar tilleriniñ diskriminatsiyasına diqqat ayırdılar. İşğalden soñ ğayrıdan tiklenüz ve birleşüvniñ müim bir elementi olaraq tamır halqlarnıñ medeniyetiniñ ğayrıdan tiklenilmesine ayrı diqqat ayırıldı.

Tedbir Temsilcilik ile Büyük Britaniya, Estoniya, Kanada, Felemenk, Norvegiya, Amerika Qoşma Ştatları, Finlândiya, İsviçre ve İsveçiya ükümetleri tarafından desteklengen “Kuçlü Ukraina içün ortaqlıq” fondunıñ yardımınen teşkil etti.

Aynı vaqıtta tedbirge Ukraina gençler ve sport nazirligi, Bütünukrain gençler merkezi, Dnipro şeer şurası ve Dnipro vilâyetiniñ arbiy idaresi, Dnipro gençler merkezi, Crimea Daily ve “Cemaat” media teşebbüsleri, “Skola MediaPatriotiv” ve “Metanetli Ukraina” cemaat teşkilâtları qol tuttı.