Daimiy Temsilci Olga Kurışko Ukrainada insan aqları boyunca BMT Monitoring missiyasınıñ temsilcileri, şu cümleden regional ofisniñ koordinatorı Ule Solvang ve insan aqları boyunca mütehassıs Tagui Melkumyan ile körüşti.

Körüşüvge Qırım platformasınıñ faaliyetini temin etüv hızmetiniñ vekilleri Anna Sıtnikova ve Tetiana Nepomaşça qoşuldı.

Temsilcilikniñ taqımı vaqtınca işğal etilgen Qırımda rusiye tarafından insan aqlarınıñ bozuluvınıñ sistematik hususiyetine, şu cümleden qırımtatar halqına nisbeten diskriminatsiya siyasetine, din serbestliginiñ sıñırlanmasına, siyasiy, etnik ve diniy sebeplerden qanunsız azatlıqtan marum etüvniñ çoqusı adiselerine, em de tutulğan şahıslarğa nisbeten sert yanaşuvğa diqqat ayırdı.

Taraflar vaqtınca işğal etilgen Qırımda insan aqları vaziyetiniñ halqara monitoringini quvetleştirmek maqsadınen, hususan, sistematik bozuvlarnıñ qayd etilmesi, cinayetlerniñ belgilenmesi ve rusiyeniñ halqara-uquqiy mehanizmler çerçivesinde mesüliyetke çekilmesine yardım etüv bağlamında ilerideki işbirligi aqqında añlaştılar.