Bugün Qırımnıñ kögnitiv deokupatsiyası meselelerinden Şuranıñ faaliyeti çerçivesinde “Qırım Muhtar Cumhuriyetiniñ ve Aqyar şeeriniñ işğalden qurtarılması ve reintegratsiyası. Esas çağıruvlar, telükeler ve olarnı yeñmekniñ yolları” adlı ekinci Dinlerara dialog olıp keçti. Tedbir Ukrainanıñ etnosiyaseti ve vicdan serbestligi boyunca Devlet Hızmeti ile Temcilcilikniñ teşebbüsinen teşkil etildi.
Tedbirde Daimiy Temsilci Olga Kurışko, Ukrainanıñ etnosiyaseti ve vicdan serbestligi boyunca Devlet Hızmetiniñ başı Viktor Yelenskiy, Qırımnıñ kögnitiv deokupatsiyası meseleleri Şurasınıñ eksperti, Turğunlıq ve birlik milliy platformasınıñ tesisçisi Yuliya Tışçenko iştirak ettiler. Tedbirge ayrıca Ukraina Ortodoks Kilisesiniñ, Ukraina Alman İncil Lüteran Kilisesiniñ, Bütünukrain İnciliy Baptist Kiliseleri birliginiñ, Yedinci Kün Adventistler Kilisesiniñ, Ukraina Musulmanlar Kongressiniñ, Din serbestligi institutınıñ, “Umma” Ukraina Musulmanlarınıñ Diniy İdaresiniñ, Qırım Muhtar Cumhuriyeti Musulmanları Diniy İdaresiniñ, Ukraina Rum-Katolik Kilisesiniñ Tışqı bağlar bölüginiñ, Diniy serbestlik Bölüginiñ (Avrasiya Missiyası) ve Açıq Ortodoks Universitetiniñ temsilcileri qoşuldı. Tedbirni Temsilcilikniñ Malümat teminlevi bölüginiñ yolbaşçısı Yevğen Bondarenko alıp bardı.
Toplaşuv Qırımnıñ işğalden qurtarılması ve reintegratsiyasınıñ esas aspektlerini muzakere etmek, kögnitiv deokupatsiya siyasetiniñ çerçivesinde halqara advokatsiya ve tasil teşebbüsleriniñ vazifelerini belgilemek maqsadınen ötkerildi. Qırımnıñ işğalden qurtarılması şaraitinde adalet tiklenüvi ve içtimaiy stabillikni inkişaf ettirüv esnasında diniy müessiselerniñ rolüne ayrıca diqqat ayırıldı.
Muzakerege diniy teşkilâtlarnıñ temsilcileri ve ekspertler qoşuldılar, olar vaqtınca işğal etilgen Qırımda diniy taqiplerge, rusiyede dinniñ teşviqat aleti olaraq qullanıluvına, işğalci memuriyetniñ cinayetlerini vesiqalamaq kerekligine ayrı diqqat celp ettiler. Muzakere iştirakçileri Qırımnıñ diniy ve medeniy mirası aqqında yararlı tasil programmalarını yaratuvnıñ, halqara ortaqlarnen işbirlikni keñişletüvniñ ve diniy diplomatiyanı faalleştirüvniñ müimligini qayd ettiler. Halqara advokatsiya meselesi ayrıca qonuşıldı: diniy teşkilâtlarnıñ bir çoq yolbaşçısı endi faal şekilde çetelde çalışa, onıñ içün yıl devamında planlaştırılğan halqara tedbirlerniñ taqvimini talil etüv teklif etildi.
Daimiy Temsilci Olga Kurışko ile Etnosiyaset ve vicdan serbestligi boyunca Devlet Hızmetiniñ başı Viktor Yelenskiy açılış sözlerinen çıqışlarda bulundılar.
Daimiy Temsilci öz çıqışında Qırımda diniy taqiplerniñ sistemalı alğa kelgenini, keçken sene Kezlevdeki soñki ukrain kilsesiniñ yoq etilmesi de bu siyasetniñ daa bir delili olğanını qayd etti. O, Temsilcilikniñ repressiya faktlarını vesiqalaştıruv ve halqara toplulıqnı işğal etilgen yarımadada insan aqları bozuvlarına qarşılıq berüvge celp etüv yönelişinde faal çalışmalar yapqanını qayd etti.
“Temsilcilik işğal etilgen Qırımda diniy taqipler ve dindar insanlarnıñ aq-uquqlarını qorçalav meseleleri boyunca çalışmağa devam ete. Keçken sene biz Kezlevdeki soñki ukrain kilsesiniñ yoq etilmesine şaat oldıq, bu din serbestliklerine sistemalı zulumınıñ daa bir köstergiçidir. Bugün biz Qırımdaki vaziyet boyunca tetqiqatınıñ neticelerini taqdim etmek ve em yarımadada, em halqara arenada yapılğan konkret adımlarnı muzakere etmek isteymiz. Medeniy miras tarafı da müimdir, çünki bir çoq diniy yerlerniñ tarihiy ve medeniy emiyeti bar. Menim sizge çağıruvım – areketlerni birleştirip, umumiy pozitsiyanı şekillendirmektir”, – dedi Olga Kurışko.
Etnosiyaset ve vicdan serbestligi boyunca devlet hızmetiniñ başı cenkke alışuv ve tecavuzcı ile qurban arasındaki sıñırnıñ yoq etilmesi havflı olğanını qayd etti. Onıñ sözlerine köre, cemiyet Qırımnıñ işğal etilgenini ve yarımadada insan aq-uquqları bozuluvları olğanını hatırlamaq kerek.
‘Bugünki künde eñ büyük telükelerden biri bu cenkniñ sıñırlarınıñ silinmesidir – onıñ er künlük aqiqat olaraq qabul etilmesi, qurban ve tecavuzcı arasındaki sızıqnıñ yoq olması. Qırım işğal etilgenini, anda sistematik insan aq-uquqları bozulğanını, büyük adaletsizlikler yapılğanını özümizge daima hatırlatmaq kerekmiz. Vicdan serbestligine qarşı cinayetleri aqqında susmaq mümkün degil”, — dep qayd etti Viktor Yelenskiy.
Temsilcilikniñ Malümat teminlevi bölüginiñ yolbaşçısı Yevğen Bondarenko em ukrain, em de halqara cemiyetke vaqtınca işğal etilgen Qırımdaki aqiqiy vaziyet aqqında daa effektiv şekilde malümat bermege yardım etecek kommunikatsiya kampaniyalarına ait esas noqtalarnı taqdim etti. O, çeşit auditoriyalar içün, şu cümleden Avropa devletleri, Afrika memleketleri, Asiya memleketleri ve Cenübiy Amerika memleketleri içün uyğunlaştırılğan eki strategik vesiqa taqdim etti. Bu materiallar bölüklerge köre tertipleştirilgen ve Qırım sakinlerine olğan munasebet, Ukrainanıñ siyasiy pozitsiyası, qanun çıqaruv mehanizmleri aspektlerini qaplap ala. Yevğen Bondarenko Rusiye işğal etilgen topraqlardan kelgen din hadimlerini teşviqat aletleri olaraq sistematik sürette qullanğanını, işğalden soñ vaziyet, güya, yahşılaştı degen illüziya yaratqanını qayd etti. Böyle areketler bir qaç yıl devamında közge çarpa ve, bizim tahminlerimizge köre, Rusiye Federatsiyası bu yönelişte öz areketlerini tek arttıracaq. İşte, bu sebepten Qırımda diniy sebeplerden repressiyalar, taqipler, insan aq-uquqları bozuluvlarınıñ aqiqiy levhasını köstermek içün din cemiyetlerinen faal işbirlik yapmaq müimdir.
Toplaşuv iştirakçileri Ukraina içinde çeşit saalarda işbirlik aqqında, hususan, Temsilcilik tarafından işlep çıqarılğan Qırım yarımadasınıñ kögnitiv deokupatsiyası boyunca kommunikatsiya kampaniyaları ve añlatuvları mevzusında daimiy mesleatlaşuv aqqında keliştiler. Qırımnıñ kögnitiv deokupatsiya meseleleri ve olarnıñ daa keniş içtimaiy ceryanlardaki rolü boyunca kilselerniñ ve diniy teşkilâtlarnıñ küçlerini birleştirmek içün bir sıra ortaq tedbirler azırlavı qararlaştırıldı.