2018 senesi boş ay (noyabr) 27 künü Temsilcilikteki halqara alâqalar hızmetiniñ reisi Yevgen Samuha Ukrainanıñ mustaqilligi ve topraq bütünligi içün küreşken ukrain qaramanlarnı añmaq maqsadınen Kıyiv şeerinde keçirilgen Bütünukrain ‘‘Bağlı olğanlar’’ aktsiyasınıñ taqdiminde iştirak etti.

Tedbirni ‘‘Ukrain halq gençligi’’ cemaat teşkilâtınen işbirlikte Ukraina gençler ve sport Nazirligi ile Kıyiv şeeri devlet memuriyeti teşkil ettiler, keçirüv yeri – ‘‘Veteran Hub’’ı – antiterroristik ameliyat/birleşken quvetler ameliyatı veteranlarınıñ ve cemaat teşkilâtlarınıñ aq-uquqlarını qorçalağan, veteranlarğa içtimaiy, ruhiy, adliy ve tasil hızmetlerni bergen birinci saadır.

İşbu leyha Ukrainanıñ cenübiy qısımında, yani Qırımda, Zaporijya ve Herson vilâyetlerinde yaşap, Ukraina halq cumhuriyetinden ve Ukrain isyancılar ordusından başlap, zemaneviy rus-ukrain cenkine qadar çeşit devirlerde devletimizni qorçalağan şahıslarğa bağışlanğandır. Bu şahıslar Ukrainanıñ cenübiy qısımında öz memleketi içün küreşken adamlar bar olğanını hatırlatmaq içün birleştirilgendir. ‘‘Cenüp ve Qırım yaqa’’ şıarı altında ukrain arbiyleri – arbiy areketlerniñ iştirakçileri aqqında 20 qısqa video ve resimler numayış etildi.