Ürmetli vatandaşlar!

Petro Bolboçannıñ askerleri 1918 senesi Çonğardaki bölşevik qamaçavını bozıp, Qırımnıñ moskova istilâsından azat etilüvini başlağanlarına bügün 100 yıl tola.Muvafaqiyetli arbiy ameliyat neticesinde Sivaş gölündeki Salkiv köprüsi zapt etildi, bu ise Ukraina Halq Cumhutiyetniñ arbiy quvetlerine deryal yarımadağa keçmege ve çiçek ayı 24 künü Aqmescitni azat etmege imkân berdi.

‘‘Aqmescitniñ ealisi kibi, Ukrainanıñ iç bir köşesinde ukrain ordusını böyle coşqunlıqnen, böyle eyecannen, böyle alğışlarnen daa qarşılamadılar. Bütün soqaqlar çiçeklernen ve Bolboçannı quvançnen qarşılağan halq ile tolu edi. Bütün yol boyu onıñ avtomatik arabası artından biñlernen adamlar çapıp, ğalipni ve qurtarıcını ozğara edi. Bu teñeştirilmez eyecannı, coşqunı iç bir vaqıt unutmaq mümkün degil’’, – dep yazğan edi öz hatırlavlarında Qırım seferiniñ iştirakçısı Borıs Monkevıç.

Şübesiz ki, arbiy ceetten Ukrain Halq Cumhuriyetiniñ ordusı Qırımda muim ğalebe qazandı. ‘‘Qızıllar’’ küçleriniñ miqdar ceetten üstünliklerine baqmadan, ukrain bölükleriniñ areketleri Qırımda bolşevik tertibini yıqıp, Aqyardaki Qaradeñiz flotunıñ gemileri üstünde ukrain bayraqlarını köterttiler.

Eminim ki, ukrain halqınıñ öz toprağı içün qaramaniy küreşiniñ tecribesi, ordumıznıñ qüvetleşmesi oğrunda bizim bügünki zametli emegimiz, diplomatlarımıznıñ halqara seviyede faaliyetleri, halqara cemiyetniñ istilâcığa birlikte yapqan basqısı Rusiye Federatsıyası tarafından hainliknen ilhaq etilgen Qırımnıñ ve Donetsk ve Lugansk vilâyetlerinde ukrain topraqlarnıñ qaytarıluvını kün-künden yaqınlaştıra.

Biz mutlaqa yeñermiz.

Ukrainağa şan-şüretler olsun!

Onıñ qaramanlarına şan-şüretler olsun!

Petro POROŞENKO