2018 senesi çiçek ayı (aprel) 16 künü Ukraina Prezidentiniñ Qırım MC Temsilciligindeki halqara alâqalar ve uquqiy talil hızmetleriniñ baş mutehassısları Ukraina Tışqı işler nazirliginiñ yanındaki Gennadiy Udovenko adına Diplomatiya akademiyasında olıp keçken ‘‘Ukrain prizması: Tışqı siyaset 2017’’ serlevalı er yılki tedqiqatnıñ taqdiminde iştirak ettiler.
Tedbirde F.Ebert adına Fondunıñ Ukrainada Temsilciliginiñ müdiri Marsel Ryotig, Ukraina Tışqı işler Naziriniñ muavini Vasıl Bodnar, Diplomatiya akademiyasınıñ müdiri Sergiy Korsunskiy, Ukraina halq deputatı, Ukraina Yuqarı Şurası tışqı işler Komitetiniñ başlığı Ganna Gopko, ‘‘Ukrain prizması’’ Tışqı işler surası idaresiniñ azaları iştirak etti.
Tedbir esnasında Ukraina tışqı siyasetiniñ talili ve ukrain diplomatlarınıñ 2017 senesi devamında 50 geografik ve funktsional yönelişler boyunca faaliyetleri taqdim etildi. Tedbir devamında Ukrainanıñ halqara seviyede faaliyeti içün metodologiya, esas yönelişler, tedqiqatnıñ hulâsaları ve tevsiyeler muzakere etildi. Mütehassıslarnıñ fikirince, Ukrainanıñ tışqı siyaseti keçken senege köre bayağı eyileşti.
Tedbirniñ iştirakçileri Brüsseldeki Sammitniñ arfesinde Ukraina Yuqarı Şurası tarafından iqtisadiy istiqrar, Halqara para fondu ve Şimaliy Atlantik Añlaşması Teşkilâtı (NATO) ile işbirlik içün muim olğan Antikorruptsion mahkeme ve milliy havfsızlıq boyunca qanunlarnıñ qabul etilüv meselesi köterildi. Tedqiqatnıñ neşir etilgen neticeleri taqdim etlidi.
Tedqiqatnıñ taqdiminden soñ ‘‘Tışqı siyasette müessiseler arasında işbirlik seviyesini nasıl kötermek mümkün?’’ mevzusında ekspert muzakeresi keçirildi. Tedbirde Ukrainanıñ tışqı siyaseti içün mesuliyetli olğan müessiselerniñ reberleri, bu cümleden, Ukraina Prezidentiniñ Memuriyetinde tışqı siyaset ve avropa integratsiyası departamentiniñ reber muavini Sergiy Leshchenko, avropa ve avropaatlantik integratsiyası meseleleri boyunca ükümet ofisiniñ müdiri Olga Stefanişina, Ukraina haber siyaseti nazirliginiñ devlet kâtibi Artem Bidenko, Ukraina Tışqı işler nazirliginiñ Siyasiy müdiri Oleksiy Makeyev, Ukraina Tışqı işler nazirligi yanındaki Cemaat şurasınıñ azası Mıhaylo Paşkov, Razumkov adına Ukraina iqtisadiyat ve siyasiy tedqiqatlar merkeziniñ ekspertleri iştirak etti.