2018 senesi oraq ayı (iyül) 1 künü Ukrainanıñ deñiz yalısında yerleşken şeerlerinde Arbiy-Deñiz Quvetleri künü munasebeti ile tantanalı tedbirler keçirilmekte. Odesa şeerinde Ukraina Mudafaa Naziri Stepan Poltoraknıñ yolbaşçılığında, Ukraina Arbiy-Deñiz Quvetleri Komandanı İgor Voronçenkonıñ iştiragi ile, Arbiy Quvetleri ve Devlet Sıñır hızmetiniñ vekilleri, Ukraina Prezidentiniñ Qırım MC Daimiy Temsilcisi, Odesa vilâyetiniñ ve şeeriniñ yolbaşçıları, emekdarlar, gönülleler ve cemiyet ögünde Arbiy-Deñiz Quvetleriniñ saflarına dört zırhlı topçı gemiler qabul etildi.
Mudafaa Naziri öz çıqışında ukrain deñiz flotunıñ quruluvı ve inkişafı işğalci devletniñ areketlerine sert qarşılıq kösterüv şaraitlerinde başlanıp, devam etkenini qayd etti. Bu qıyın şaraitlerde teşkil etilgen Deñiz komandanlığı ve Deñiz piyadesi komandanlığı deñizde ve yalıda quvetlerini idare ete bilmekte. Ayrıca Cenübiy arbiy-deñiz bazası islâatlar keçirip, Azaq yönelişinde faaliyetini başlağanı aqqında haber etildi. Tantanalı tedbir çerçivesinde Daimiy Temsilci Borıs Babin Ukraina Arbiy Quvetleri komandanlığınıñ davet etilgen vekillerini ve nişanlar ile taqdirlengen arbiylerni bayram ile hayrıladı.