2018 senesi ilk yaz ayı (iyün) 7 künü Ukraina çetel işler Naziri Pavlo Klimkin Ankaranı ziyaret etip, Türkiye Cumhuriyetiniñ Çetel işler Naziri Mevlüt Çavuşoğlu ve Qırımtatar halqınıñ meseleleri boyunca Ukraina Prezidentiniñ yardımcısı Mustafa Cemilev ile beraberlikte Ramazan ayı munasebeti ile iftarda iştirak etti.

Pavlo Klimkin öz çıqışında Ukraina çoq milletli devlet olğanını, musulmanlar ise halqımıznıñ bir qısımını teşkil etkenini qayd etti.

Türkiye Cumhuriyetiniñ Çetel işler Naziri öz nevbetinde Ukraina ile Türkiye arasındaki strategik işbirlik aqqında söz yürsetir eken, Ukrainanıñ egemenligi ve territorial bütünligi boyunca Türkiye Cumhuriyetiniñ fikiri deñişmez olğanını, Qırım meselesini bütün halqara meydançıqlarında kötermege devam etecegini bildirdi.