2018 senesi ilk qış (dekabr) ayı 7 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov yolbaşçılığında Temsilcilikte Ukraina devlet maliye hızmeti Universitetiniñ Qırım şübesinde tasil faaliyetini ğayrıdan tiklev boyunca muşavere keçirildi, tedbirde Devlet Maliye Hızmetiniñ Herson vilâyetinde, Qırım Muhtar Cumhuriyetinde ve Aqyar şeerindeki Baş idaresiniñ reisi İgor Klım, Ukraina devlet maliye hızmeti Universitetiniñ, devlet maliye Fondunıñ Herson vilâyetinde, Qırım Muhtar Cumhuriyetinde ve Aqyar şeerindeki regional şübesiniñ, Herson vilâyeti devlet memuriyetinde tasil ve ilim Bölüginiñ vekilleri iştirak etti.

Muşavere esnasında Herson şeerinde universitet şübesiniñ tasil kompleksi, yatakhanesi içün kelişken binalar baqıldı, ocalar taqımını celp etüv meselesi muzakere etildi.

Muşavereniñ neticesi olaraq, taraflar Ukraina devlet maliye hızmeti Universitet bölüginiñ açıluvı boyunca nevbetteki areketlerni uyğunlaştırdı. Bölükniñ açıluvı vaqtınca işğal etilgen Qırımda yaşağan Ukraina vatandaşları içün Ukrainanıñ qıtaiy qısımında bergi ve gümrük saalarında aliy tasil aluv imkânlarını yaratır. Qoşma malümat: 2018 senesi boş ay (noyabr) 27 künü Ukraina devlet maliye hızmeti Universitetiniñ İlmiy şurası Herson şeerinde Qırım şübesini ğayrıdan tiklemek qararını aldı.