2018 senesi saban ayı (mart) 26 künü Ukraina Prezidentiniñ Qırım MC Temsilciligindeki halqara alâqalar ve uquqiy talil hızmetleriniñ hadimleri Ukraina Tışqı işler nazirliginiñ yanındaki Gennadiy Udovenko adına Diplomatiya akademiyasında olıp keçken ‘‘Aqsızlıq soñrası. Qırım işğali ve onıñ halqara uquq ve siyasetke tesiri’’ serlevalı munaqaşada iştirak ettiler.

Munaqaşada Ukraina Tışqı işler Naziriniñ muavini Vasıl Bodnar, Poloniya Cumhuriyeti Tışqı işler naziriniñ muavini Bartoş Tsihotskiy, Halqara işler Poloniya İnstitutı Tedqiq ve talil bürosınıñ yolbaşçısı Bartoş Visnevskiy, Poloniya-Rusiye dialogı ve özara añlav merkeziniñ eksperti Ernest Vıtsişkeviç, halqara uquq saasında professorlar Mıkola Gnatovskiy (Taras Şevçenko adına Kıyiv Milliy Universiteti), Dino Kritsiotis (Nottingem universiteti) ve Vladıslav Çaplinskiy (Poloniya ilimler akademiyasınıñ Uquqiy ilimler institutı), Diplomatiya akademiyasınıñ hadimleri, uquqqorçalayıcı taqımlarnıñ ve cemaat teşkilatlarnıñ vekilleri iştirak etti.

Tedbir esnasında Qırım yarımadasınıñ işğali boyunca Ukraina ve Poliniyanıñ siyasetleri ve devletler arasında kelecekte tışqı siyasiy işbirlik muzakere etildi. Poloniya Cumhuriyeti Tışqı işler naziriniñ muavini Poloniya ve halqara cemiyet RF Prezidenti saylavlarınıñ qanuniyetini tanımağanlarını qayd etti. Munaqaşa devamında Rusiye tarafından işğal etilgen Qırımda kütleviy öldürüv silâlarnıñ, qıynavlarnıñ, gibrid cenk vastalarnıñ işletilüvi, deñiz ve ava boşluqlarınıñ bozuluvı, bu cinayetlerde qabaatlı olğanlarğa qarşı yañı siyasiy, iqtisadiy ve personal sanktsiyalarnıñ kirsetilüvi ya da mevcut olğanlarnı quvetleştirüv muzakere etildi. Munaqaşanıñ soñunda Poloniya ilimler akademiyasınıñ Uquqiy ilimler institutı ve Poloniya-Rusiye dialogı ve özara añlav merkezi tarafından azırlanğan «The Case of Crimea`s Annexation Under International Law» (‘‘Halqara uquq ceetinden Qırımnıñ işğali meselesi’’) serlevalı ilmiy tedqiqatı taqdim etildi.