Ukraina Prezidenti Petro Poroşenko işğal etilgen Qırımnıñ Ermenibazar şeerinde yüz bergen ekologik facia aqqında haber alğanını ve ukrain ekologlar kederli malümatlar bergenini Ukraina Milliy Havfsızlıq ve Mudafaa Şurasınıñ oturuşında bildirdi.

Petro Poroşenko, bu vaziyetni doğurlamaq içün Ukraina bir qaç adım yapmağa kerek olğanını qayd etti. ‘‘Halqara komissiyanı teşkil etip, Ukrainağa doğrudan-doğru tesir etken ekologik facianıñ sebeplerini tapıp, onı toqtatmaq kerekmiz’’, – dep qayd etti devletimizniñ Başlığı. Ukraina Prezidentiniñ malümatına köre, Qırımdaki ekologik facia rusiye arbiylerniñ talimatları neticesinde ekologik qorçalav vastalarnıñ bozuluvı sebebinden yüz berdi.

Devletniñ Başlığı Ukraina Baş Nazirine ‘‘Ermenibazarda yaşağan balalarnı Herson vilâyetine davet etmek, bu balalarnı raatlatmaq, tedaviylemek, daa doğrusı, ukrain balalarnı bu ekologik üçümden qorçalamaq’’ içün bütün kerekli şartlarnı azırlamağa avale etti. Petro Poroşenko vilâet devlet memuriyetlerine mütenasip davetnamelerni azırlamağa, Devlet sıñır hızmetine ise bu balalar içün memuriy sıñırdan keçüvni teşkil etmege avale etti. ‘‘Ukraina devletiniñ qayğıruvını em işğal etilgen ukrainalı Qırımda, em de işğal etilgen ukrainalı Donbassta yaşağan bütün vatandaşlar is etmeli’’, – dep qayd etti Devletimizniñ Başlığı.