Fevralniñ 5-nde kerçekleşken esir deñişüvi vaqtında rusiye esirliginden 157 ukrayin qaytarıldı, olarnıñ arasında – deñizci piyade asker, serjant usta, qırımtatarı Eskender Kudusov ve 501-nci deñiz batalyonınıñ arbiyi, qırımtatarı Ruslan Kurtmallayev da bar.

2014 senesi Qırımnıñ işğali vaqtında Eskender Kudusov Kefede deñiz piyadesinde hızmet ete edi. Asker Ukrayina ögünde bergen antına sadıq qalıp, arqadaşlarınen beraber qıtağa yol ala, anda da hızmetini devam ete.

2022 senesi aprel ayında Mariupol içün uruşlar vaqtında Eskender Kudusov esir tüşti. Rusiye tarafı onı başta qanunsız olaraq 25 yılğa mahküm etti, amma 2025 senesi oktâbr ayında müddet 29 yıl 6 ayğa qadar arttırıldı. Eskender Kudusov Ukrayinağa sadıqlığı ve baqışları sebebinden ayrıca işkencelerge oğratıldı.

Ruslan Kurtmallayev de 2022 senesi aprel ayında Mariupol mudafaası vaqtında rus esaretine tüşti. Bütün bu vaqtın esirlikten onı onkologiya hastalığınen küreşken ömür arqadaşı, Olga Kurtmallayeva bekledi.

Ukrayina er bir vatandaşnıñ qaytması içün küreşini devam ete. Rusiye esirliginde olğan er kesni hatırlaymız.