Prezident Volodımır Zelenskıy kiçik aynıñ 26 kününi Qırım ile Aqyarnıñ işğal etilmesine qarşılıq kösterüv künü olaraq ilân etip, ferman imzalağanını bildirdi.

”Age of Crimea 2020” forumınıñ açılış tedbiri esnasında Devlet başlığı altı yıl evel aynı bu künü Aqmescitte Ukrainanıñ topraq bütünligine ve mustaqilligine qol tutıp, eñ çoq insan toplanğanını hatırlattı.

”Cemi miting iştirakçileriniñ cesürliklerine ve qaramanlıqlarına yüksek qıymet kesip, bügün Qırım Muhtar Cuhhuriyeti ile Aqyarnıñ işğal etilmesine qarşılıq kösterüv künü aqqında ferman imzalayım. Bu kün er yıl kiçik aynıñ 26-da qayd etilecektir”, – dep ayttı Prezident.

Volodımır Zelenskıynıñ qayd etkenine köre, Qırımnı Ukrainağa qaytaruv, yalıñız Devlet başlığınıñ vazifesi ve vatandaş olaraq şahsiy mevamı degildir.

”Bu, yalıñız umumiy arzumız degildir. Bu, dünya yüzündeki havfsızlıqnıñ kefaletidir. Bu, işançnıñ ğayrıdan tiklenüvi. Halqara uquqqa ve adaletke işançnıñ ğayrıdan tiklenüvidir”, – dep qayd etti o.

Prezident, dünya cemiyeti Qırım oğrundaki küreşinde Ukrainağa qol tutqanını qayd etti.

”Bu kün mıtlaqa kelecegini bilemiz”, – dep bildirdi Devlet başlığı.

Volodımır Zelenskiy qayd etti ki, Qırımnıñ Ukrainağa aitligi, isbatlanmasını talap etmegen bir kerçektir.

”Bu meselede ukrainalılarnıñ yüzde yüzü fikirdeştir. Bu sebepten Qırımnı qaytaruv – milliy ğayemizniñ tartışılmaz qısımıdır”, – dep saya Prezident.

Volodımır Zelenskıy, ille bir kün ukrain sportçıları ve artistleri Qırımda çıqışlarda bulunacaqlarında, Qırımtatar Milliy Meclisi ise Aqmescitteki qanuniy binasına qaytacağında emindir.

“Bunıñ episi ille de kerçekleşir. Bunda bütün dünyanıñ menfaatı bardır. Çünki cenkniñ tolusınen bitmesi Donbasta kerçekleşir. Qırımda ise tolusınen barışıq kerçekleşir”, – dep qayd etti Volodımır Zelenskıy.

Qırımtatar halqınıñ lideri Mustafa Cemilev Prezidentke işbu fermannı imzalağanı içün öz minnetdarlığını bildirdi.

”Prezident efendi, çeşit türlü fırqalarnı temsil etken 150 yaqın deputat tarafından teklif etilgen fermannı imzalamağa niyetlengeniñiz içün öz minnetdarlığımnı bildirem”, – dep ayttı Mustafa Cemilev.

Menba: Ukraina Prezidentiniñ İnternette resmiy temsilciligi