Ukraina Prezidenti Volodımır Zelenskıy qanunsız alda apiske alınğan bütün Ukraina vatandaşlarını, bu cümleden, qırımlı siyasiy mabuslarnı azat etilüvine dair ümüt bildirdi.

Kıyiv şeerinde ”Age of Crimea 2020” forumınıñ açıluvı merasiminde Devlet başlığı, Ukraina bir çoq vatandaşımıznı, olarnıñ arasında Qırım siyasiy mabusları Edem Bekirovnı, Oleksandr Kolçenkonı, Volodımır Baluhnı ve Oleg Sentsovnı qaytarıp olğanını hatırlattı. Azat etilgen Sentsov Prezidentke Rusiyedeki koloniyada bulunğan arada işletken savutını bağışladı. O vaqıt Volodımır Zelenskıy ile Oleg Sentsov işbu savutnı azat etilgen ukrainalılarnıñ tanıtuv işaretlerinen toldurmağa keliştiler.

”111 vatandaşnı evlerine qaytarıp oldıq. Optimist olsam da, işbu savut yarısına qadar boş, dep sayam. Onıñ içün biz er kün vatandaşlarımıznıñ episini azat etmek içün qolumızdan kelgenini yapamız ve bu savut eñ yaqın vaqıtta bütünley tolu olacağına inanamız”, – dep bildirdi Prezident.

Volodımır Zelenskıy, akimiyet kelecek içün çalışqanını, amma keçmişimizni de unutmağanını qayd etti.

”Qırımda birinci qurbanlarımız olğan Reşat Ametovnıñ, Sergiy Kokurinniñ ve Stanislav Karaçevskiyniñ adlarını hatırlaymız. Hırsızlanğan Tımur Şaymardanovnı ve Ervin İbragimovnı hatırlaymız. Bahtımızğa, jurnalist Mıkola Semena endi Kıyivde buluna. Yazıqlar olsun ki, ale daa esirlikte qalğan aq qorçalayıcı Server Mustafayevni de hatırlaymız”, – dep bildirdi o.

Menba: Ukraina Prezidentiniñ İnternette resmiy temsilciligi