Aziz vatandaşlar!

Mında, Bıkivnâda, bu aziz ve matem yerinde bulunğan arada ister-istemez sükünetni diñleysiñ. Mında biñlernen öldürilgen qabaatsız qurbanlar kömülgendir. Olarnı gizliden qurşunğa tizip, köme ediler. Bu deşetli cinayetlerni yerli sakinlerniñ bile haberleri olmadan yapmağa tırıştılar. Kommunistik akimiyet o vaqialarnı onyıllarnen yalan ve sır ile örtmekte edi. O vaqıttaki faal dissidentlerniñ, faal cemaatnıñ areketleri neticesinde ilk malümatlar toplanıp beyan etildi. Amma yalıñız mustaqil Ukraina zamanlarında bu ormanda yüz bergen ve ukrain nekropoli adını taşımağa lâyıq olğan deşetniñ kerçek miqyası belli oldı.

Qurbanlarnıñ kerçek miqdarı aqqında malümat ale daa yoq. Alimlerniñ malümatlarına köre, 30-35 biñ, bazı esaplarğa köre ise 100 biñge qadar elâk olğanlar aqqında söz yürsetile. ”Mahsus ihtiyaclar” içün – bolşevikler bu topraq demetiniñ maqsadını bu şekilde gizlediler. Bu qarar arhivlerde saqlanıp qaldı. Mahsus öldürmek ihtiyacı. Ukrain ziyalıları, devlet ve din erbapları, sözde ”temizlevlerniñ” qurbanları, sabıq cenk esirleri, leh, alman, bulğar, litvan ve çoqtan-çoq başqa milletlerniñ vekilleri – mında soñki mekânlarını tapqan adamlarnıñ cedveli pek uzundur.

Bıkivnâ ormanında ressam Mıhaylo Boyçuk, yazıcılar Mayk Yogansen ve Mıhal Semenko, mitropolit Vasıl Lıpkivskiy ve pek çoq belli ve, yazıqlar ki, ale daa şahısları belli olmağan insanlar yatmaqta.

Olarnıñ hatıralarını sükünet daqqası ile añmağa rica etem.

…

Aziz ukrainalılar!

Bu sene tek bizge degil de, bütün dünyağa muim tarihiy dersler aqqında hatırlata. Tünevin biz qırımtatar halqı sürgünliginiñ 75 yıllığını qayd ettik. Berim (sentâbr) ayı 1 künü ise bütün dünya Ekinci cian cenk başlanmasınıñ 80-yıllığını qayd etecektir. O vaqıt tecavüzci ile barışuv siyaseti neticesinde insaniyetniñ tarihındaki eñ büyük davanıñ açılmasına yol berildi.

Şunı da hatırlatmaq isteyim ki, kommunistik qurumınıñ insaniyetke qarşı deşetli cinayetleri, bu cümleden 1917-1919 seneleri Ukrain inqlâbı devirinde Ukraina öz devletçiligini coyğanı sebebinden de mümkün oldı. Milletimiz öz hataları içün pek büyük fiyat ödedi. Bu hatalar yüz yıl evelsi yapılğan edi. Bu acı tecribeniñ tekrarlanması aqılımızğa bile kelmesin.

Onıñ içün er vaqıt mıtlaqa Avropağa yönelişimizni, Ukrainanıñ Avropağa yönelişini istiqrarlı şekilde tekrarlaymız. Ukrainanı Rusiye Federatsiyanıñ quçaqlarına qaytarmağa mümkün degil. Terekleri insan qanından ösüp çıqqan topraqlarda istilâcı ve bu qannı aqızğan qurumnıñ mirasçısı ile siyasiy ayın-oyunlar iç bir alda olmasın.

Siziñle beraber, aziz dostlarım, bunı pek yahşı añladıq ve seçken yolumızdan iç bir kere sapmadıq. Soñki beş yıl devamında devletimizde dekommunizatsiya ceryanı aqiqaten bitti, kommunist mefküresi yasaq etildi. Ukraina Ortodoks Kilisesi Ekümenik Patriginden avtokefallik aqqında Tomosnı aldı. Moskova tarafından başlatılğan cenkte bizni istilâcılardan işançlı şekilde qorçalağan ukrain ordusı teşkil etildi. Halqara liderler olğan memleketler ve halqara teşkilâtlar ile işbirlikte emiyetli muvafaqiyetlerge iriştik, ukrain qanuniyetini Avropa standartlarına uyğun şekilde ketirüv boyunca bir sıra islâatlar keçirildi.

Kommunistik terrorı faciası kelecek içün bir ders, ukrain toprağında ”rus sulhını” ğayrıdan tiklemek ıntıluvlardan bir qorçalayıcı olmalı.

Bügünde-bügün Ukraina Avropanıñ Şarqıy sıñırlarında endi bolşevik imperiyasınıñ izdeşi Rusiya Federatsiyası başlağan yañı istilânı toqtatıp turmaqta. Ziyadesinen küçlü, çoq sayılı ve tişlerine qadar silâlanğan istilâcığa qarşılıq kösterüv Ukraina ile serbest dünyada AQŞ, Büyük yedilik kibi liderleriniñ, ve Ukrainağa qol tutqan bütün küçlü birlikniñ semereli ve muabbet areketleri sayesinde mümkün oldı. Halqara cemiyet ukrain halqına qol tutmağa devam etecegine ümüt etem. Eminim ki, yalıñız böyle qol tutuv, istilâcığa yapılğan diplomatik basqı sayesinde egemenligimizni ve topraq bütünligimizni ğayrıdan tikley bilirmiz. Ukrain egemenligini ve ukrain bayrağını istilâcı tarafından işğal etilgen er topraq parçasına qaytarırmız, Ukrainağa Qırım ile Donbasnı qaytarırmız.

Şimdi ise içki siyasiy davalarğa oğramayıp, akimiyet deñişüvi devirini keçmelimiz. Yalıñız yañı saylanğan Ukraina Prezidentiniñ vekâletlerini almasını degil de, Yuqarı Şurağa saylavlarnı da közde tutam.

Çünki duşmanımız gizlenmeyip bu siyasiy istiqrarsızlıq devirini islâatlar ve Avropağa integratsıya yolunda qazanğan muvafaqiyetlerimizni bozmağa istey. Cemiyetimizge añlaşmamazlıq, duşmanlıq ve qarışıqlıq ketirmege, ukrainlılarnıñ şahsiy ğayretlerinen akimiyet ile halqnı bir-birine qarşı qoymağa istey. Ukrain devletçiligini yoq etmege niyetlene.

Bügün bütün mesüliyetli ukrain siyasetçileriniñ ögünde turğan esas vazife – islâatlar siyasetiniñ istiqrarlığını, ukrain devletçiliginiñ quvetleşmesini, Avropa ve Avropa-atlantik integratsıyasınıñ devam etmesini temin etmektir.

Yalıñız böyle siyaset Avropa, AQŞ ve başqa çetel ortaqlarımıznıñ qol tutuvını kefil eter, işte bu qol tutuvnı Rusiye şimdi bozmağa tırışa. Bunı pek yahşı añlamaq kerekmiz.

”Bıkivnâ qabirlerindeki” çoq milletli meftalar bizge merhametsiz siyasetniñ bozucı dalğaları tap keçken asırda milliy ve başqa içtimaiy farqlılıqlarğa baqmağanını ve öz yolunda qabaatları olmağan insanlarnıñ taqdirlerini ve ömürlerini yoq etkenini hatırlata.

Halqara cemiyet birlikte yapqan areketleri ile şimdi ve kelecekte totalitar qurumlarınıñ qaytmasına yol bermemeli.

Bu, bizim mirasçılarımız ögindeki umumiy mesüliyetimizdir. Böyleliknen bügünki tınç yaşayışımız içün canlarını bergenlerni eñ güzel şekilde añarmız. Medeniy areket, sıñırları açıq olğan dünyanı qurmaq imkâniyeti, zemaneviy insanğa berilgen serbest ve muvafaqiyetli inkişaf aqqı içün olarğa minnetdar olmalımız.

Ukraina mustaqilligi ve serbestligimiz içün pek yüksek fiyat ödengen edi. Em kerige, em kelecekke baqıp, bunı hatırlamalımız.

Bıkivnâ ormanında kömülgen bütün cezalav qurbanlarınıñ ruhları şad olsun. Ukrainada ve çetelde qurşunğa tizilip kömülgenlerniñ cemi ruhları şad olsun. Olar ebediyen hatıramızda qalacaqlar.

Ukrainağa şan-şüretler olsun!