Kıyiv cıvarında ekseriyetnen 2014 senesi Qırım Rusiye Federatsiyası tarafından işğal etilgen soñ köçip kelgen qırımtatarlar yaşamaqta. 200-ge yaqın qoranta çeşit türlü yerli iş saalarında muvafaqiyetnen çalışıp, köyniñ içtimaiy ayatında faal şekilde iştirak ete.
2018 senesi qırımtatar cemaatı ”Birlik” teşkilâtını meydanğa ketirdi ve beraberlikte medeniy merkez binasını qurmağa başladı.
”Böyle merkezniñ teşkil etilmesi – yerli akimiyet, cemaat ve iş adamları umumiy vazife üzerinde beraber çalışıp meydanğa ketirgen içtimaiy birlikniñ güzel nümünesidir. Böyle bir merkez içün ”Birlikten” daa güzel bir ad tapmaq qıyın: Qırımda al-azırda neler olayatqanını epimiz köremiz, qırımtatarlar ve ukrainler işğalge qarşı beraberlikte küreşeler ve bir-birlerine yardım eteler. Tamır qırımtatar halqına qol tutuv – Ukraina Prezidentiniñ Qırım MC Temsilciliginiñ faaliyetinde ilk nevbetteki vazifelerden biridir. Vazifemiz, tamır halqlarnıñ ve hususan qırımtatar halqınıñ mevamını qanuniy seviyede pekitmektir.
Ukraina Prezidenti milliy ve diniy çeşitligine yalıñız sözde qol tutuvnen yetinmey, böyle qol tutuvnıñ bir misali – Diniy bayramlar aqqında fermannıñ imzalanması oldı. Zemaneviy Ukrainanıñ öz egemenligi ve mustaqilligi içün küresine qırımtatar halqınıñ issesi ise er yıl fevral 26 künü qayd etilecek Qırım Muhtar Cumhuriyetiniñ işğal etilmesine qarşılıq kösterüv künü olaraq ilân etilmesi mütenasip Ferman ile pekitildi.
Ukraina Mustaqillik Künü munasebetinen qırımtatarlar devlet tarafından mükâfatlandı. Ve şahsen ”Qırım birdemliginiñ” yöneticisi Server Mustafayevge bu mükâfatnı bere bilecegimiz künni sabırsızlıqnen bekleymiz ve yaqınlaştıramız. ”Bügünde-bügün epimiz beraber onıñ azat etilmesi, diger siyasiy mabuslarnıñ azat etilmesi ve Qırımnıñ işğalden azat etilmesi içün küreşemiz”, – Qırımtatar ”Birlik” medeniyet merkeziniñ açılışında yapqan çıqışta dep ayttı Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.