Ukraina Prezidentiniñ Qırım Muhtar Cumhuriyetindeki Temsilciligi işğalci devlet Rusiye Federatsiyasınıñ vatandaşlığı Qırım yarımadası işğal etilgen soñ zorbalıqnen berilgenini ve Ukraina ile halqara cemiyet tarafından tanılmağanını hatırlata. Vaqtınca işğal etilgen topraqlarda berilgen RF pasportarı da tanılmay ve iç bir türlü uquqiy neticege ketirmey. Bu aqta Temsilcilik 2019 senesi Gaagada Halqara ceza mahkemesinde iştirak etken devletlerniñ Assambleyasında beyanat yapqan edi.
2014 senesi halqara cinayet yapqan Rusiye Federatsiyası Qırım sakinlerini topraqnen beraber onıñ mülkiyetine keçken qullar olaraq qabul etti. Ukraina çetel işler Nazirliginiñ ”Mecburiy şekilde pasportlaştıruv – işğal şaraitlerinde yaşamağa mecbur olğan Ukraina vatandaşlarına nisbeten alıp barılğan cezalayıcı siyasetniñ bir parçasıdır, işğalci Rusiye memuriyeti Ukraina vatandaşlarına evelden planlaştırılğan ve qaba şekilde amelge keçirilgen basqısını yapmaqta” degen beyanatına qol tutamız.
Avtomatik şekilde berilgen vatandaşlıq esasında ukrain rejissör Oleg Sentsov Rusiyede beş yıl devam etken siyasiy dava esnasında ukrain diplomatlarınen körüşüvlerden ve Ukraina tarafından tam qanuniy qorçalavdan marum etilgenini hatırlaymız. 2020 senesi saban ayınıñ 20-de Volodımır Putin öz emirinen Ukraina vatandaşlarına Qırım yarımadasında topraq mülkiyetini yasaq etken edi. Topaqlar ”sıñırğa yaqın” olğanları içün tek RF vatandaşlarına ait ola bile. Rusiye vatandaşlığını mecburen aldırtacaq areket aynı vaqıtta halqara uquq şartlarını bir kere daa qaba şekilde bozdı.
Vatandaşlıq mevzusınıñ daa bir tarafı bar – duyğular. Gibrid siyasetini alıp barğan Rusiye ukrain cemiyeti içinde suniy çatışmalarnı qozğalamağa istey, biz em buña, em memleketimizniñ şarqındaki silâlı duşmanğa qarşılıq köstermelimiz.
Qırım MC-de ve Aqyar şeerinde yaşağan Ukraina vatandaşları saylamaq aqqından marum etilgen edi. Bügünde-bügün işğal etilgen yarımadada cemaat faalcilerine, jurnalistlerge, qırımtatar milliy ruhunıñ vekillerine basqı yapılıp, olarnı işğalci devletniñ qaidelerini kütmege ya da Qırımnı terk etmege mecbur eteler. Ukraina tarafdarlarını apishanelerge taşlaylar, Qırımnı Rusiyesiz körgen adamlar canlarından da marum etile bile. Ukrain cemiyeti basqı altında yaşağan semetdeşlerine er ceetten qol tutmalı, RF silâlı tecavüzi şaraitlerinde memleketniñ birligini bozğan areketlerge qoşulmamalı. Qırım sakinleri, küçük Vatanlarına qoşma olaraq, büyük Vatanğa saip olğanlarını, onıñ adı ise Ukraina olğanını hatırlamalılar. Olar ukrain medeniy ve haber saalarınıñ bir parçası olğanını is etmeliler, halqara ortaqlarımızdan alınğan destek aynı vaqıtta Ukraina cemiyetiniñ Qırım yönelişindeki faaligine ve birdemligine bağlıdır.
Ukraina Prezidentiniñ Qırım MC-deki Temsilciligi vaqtınca işğal etilgen topraqlarda yaşamağa devam etken, ya da Rusiye Federatsiyasınıñ tecavüziy areketleri sebebinden yarımadanı terk etmege mecbur olğan Qırım sakinleriniñ aq-uquqlarını em devletniñ içinde, em halqara meydançıqlarda qorçalamağa devam etecektir.
Kelecek afta Ukrainanıñ vaqtınca işğal etilgen topraqlarını ğayrıdan integratsiya etüv meseleleri boyunca Nazirlik ile beraber işğalden azat etüv ve ğayrıdan integratsiya etüvge dair devlet siyasetiniñ aktual qulavuzını taqdim etip, mecburiy vatandaşlıq meselesine bir kere daa diqqat ayırırmız. Ve yalıñız topraqlarnıñ keri qaytmasını degil de, aynı vaqıtta insanlar arasındaki bağlarnıñ qorçalanmasını maqsat etip qoyğan siyasetni amelge keçirmege devam etecekmiz.
Qırım sakinleri – ukrainalılardır!
Qırım Ukrainadır!
