Ürmetli vatandaşlar!

Bügün biz muim vaqianı – Qırımtatar halqınıñ birinci toplaşuvı – birinci Qurultayı 100-yıllığını qayd etemiz.

‘‘Bir buçuq asır evelsi toqtatılğan siyasiy ayatımız bügün sañki dersin yañıdan başlana’’, – bu tarihiy sözlernen 1917 senesi Qırım Muftisi Noman Çelebicihan Qırımtatar halqı birinci Qurultayını açtı.

Onıñ neticesinde Qırım Halq Cumhuriyeti ilân etildi, ükümet quruldı. Bundan da ğayrı, sınfiy imtiyazlar lâğu etilip, bütün Qırım sakinleri içün teñ esas demokratik aqlarnı ve serbestliklerni ilân etken, bu cümleden, qadınlarğa erkeklernen musaviy şekilde saylamaq ve saylanmaq aqqını qanunlaştırğan Anayasa qabul etildi.

Şunı da qayd etmeli ki, toplaşuvnıñ açılış merasiminde Ukraina Merkeziy Şurasınıñ eyeti de iştirak etti.

Bolşeviklerniñ qanlı terrorı qırımtatarlarnıñ milliy muhtariyet arzusını viran etse de, birinci Qurultay Qırım ve bütün Ukraina tarihında teren iz qaldırdı.

İmperialistik planlarını taşığan Rusiye tarafından şimdiki Qırım işğali yarımadada kene de qırımtatarlarğa, ukrainalılarğa ve Ukrainağa sadıq qalğan başğa millet vekillerine qarşı duşmanlıq, qorqu, basqı ve cezalavlarnı canlandırdı.

Ukraina öz mustaqilligini qorçalamağa, territorial bütünligini ğayrıdan tiklemege ve RF tarafından işğal etilgen topraqlarında öz vatandaşlarını qorçalamağa areket ete. Demokratik usullarnı qullanıp, basqıncını adaletli şekilde cezalamaq niyetinen Birleşken Milletler Teşkilâtına, Halqara Cinaiy Mahkemesine, başqa halqara ve Avropa teşkilâtlarına israrlıqnen muracaatta bulunamız.

Mustaqil ve bağımsız Ukrainanıñ terkibinde qırımtatar halqınıñ milliy muhtariyeti üstünde iş alıp barıla.

Anayasa komissiyasınıñ iş grubından eñ yaqın vaqıtta Ukraina Anayasasınıñ X-cı bölügüne kirsetilecek uyğunlaştırılğan deñişmeler ve ilâvelerni bekleyim. Olar qırımtatar halqınıñ ve yarımadada yaşağan başqa millet vekilleriniñ aq-uquqlarını temin etecek muhtariyetniñ statusını qanuniy şekilde pekitecek. Ve ümüt etem ki, bundan soñ Ukraina halq mebusları bu kerçekten de pek muim meselede ikmetli qarar alırlar.

Eminim ki, qırımtatar halqınıñ öz aq-uquqları ve öz toprağı içün alıp barğan kureşi, onıñ birdemligi ve Ukraina devletiniñ qurucılığında ukrain halqınen fikir ve areket birliği, Qırımnı Ukrainanıñ terkibine qaytarmağa yardım etip, demokratik Avpora memleketleriniñ horantasında muvafaqiyetli inkişafımızğa hızmet eter.

Ukraina Prezidentiniñ Qırımtatar halqı birinci Qurultayı 100-yıllığı munasebetinen müracaatı Ukraina Yuqarı Şurasınıñ tantanalı toplaşuvında oquldı, toplaşuvda Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin ve onıñ Birinci muavini İzet Gdanov da iştirak ettiler.