2020 senesi kiçik ay (fevral) 13 künü Ukraina Prezidenti Volodımır Zelenskıy Ukraina Prezidentiniñ Qırım MC-deki Daimiy Temsilcisi Anton Korınevıç ve onıñ muavinleri Darya Svırıdova ve Tamila Taşeva ile körüşti.
Körüşüvniñ başında vaqtınca işğal etilgen Qırım MC-de ve Aqyar şeerinde yaşağan balalarnıñ vaziyeti muzakere etildi. Daimy Temsilci Prezidentke balalarnıñ vaziyetinen bağlı esas meselelerni tarif etti, bu cümleden siyasiy mabuslarnıñ balaları, öksüz balalar, tasil ceryanınıñ arbiyleştirilüvi, balarnı ve gençlerni sözde ”genç ordu” (yünarmiya) saflarına celp etüv aqqında ikâye etti. Anton Korınevıç Volodımır Zelenskıyğa siyasiy mabus Üzeyir Abdullayevniñ qızı yapqan resimni ve ”Qırım balalığı” teşkilâtı tarafından cıyılğan bala mektüplerini taqdim etti.
Ukraina Prezidenti Qırımda yaşağan balalar ve gençler ile çalışuv esas vazifelerinden biri olğanını, onıñ içün olarnen bağ tutmağa keder etken bütün manialarnı yoq etmek, olar içün ukrain aliy oquv yurtlarına kiriş şartlarını qolaylaştırmaq ve Ukrainanıñ nezareti altında bulunğan topraqlarda yaşayışlarını qurmalarına yardım etmek kerek olğanını qayd etti. Devlet başlığı vaqtınca işğal etilgen topraqlarda yaşağan gençlerge Ukraina vatandaşlığını qorumağa yardım etken devlet programmasını azırlamağa avale etti.
Temsilcilikniñ istidatlı qırımlılarğa inkişaf, tasil ve devletimizni halqara meydançıqlarda taqdim etüv içün grantlar berecek mahsus fondnıñ teşkil etilmesi ile bağlı olğan teklifine Volodımır Zelenskıy qol tuttı.
Körüşüv esnasında Prezident Ukrainanıñ nezareti altında bulunmağan Donbas topraqlarında tutulğan Ukraina vatandaşlarını azat etüv ve vaqtınca işğal etilgen Qırımda ve Rusiye Federatsiyasında qanunsız alda tutulğan vatandaşlarımıznı, bu cümleden, qırımtatarlarnı azat etüv boyunca eki yönelişte faaliyet alıp barılğanı aqqında haber etti. Anton Korınevıç Volodımır Zelenskıyğa siyasiy mabuslarnıñ ve esirlerniñ aq-uquqlarını qorçalav boyunca qanun leyhası azır olğanını tarif etti ve Prezident onı eñ yaqın vaqıtta Parlament muzakeresine taqdim etecegine ümütini bildirdi.
Devlet başlığınıñ aytqanına köre, işğal etilgen topraqlarda yaşağan insanlarnen bağ tutuv pek müimdir. Devlet olarnı hatırlağanını, olar aqqında tüşüngenini, inkişaf etkenini ve vaqtınca işğal şaraitlerinde yaşağanları Ukraina ile munasebetlerine tesir etmegenine köstermek kerekmiz. İlk-evelâ, qırımlılar içün vatandaşlıq vaziyetleri aqqında vesiqalarnıñ ve pasportlarnıñ, memuriy hızmetlerniñ berilüvini, memuriy sıñırdan keçmelerini qolaylaştırmaq kerekmiz.
Volodımır Zelenskıy vaqtınca işğal etilgen yarımada ile memuriy sıñırda infraterkip leyhalarnıñ muvafaqiyetli şekilde amelge keçirilmesi ve KÇNN-da hızmet ve tertip zonalarnıñ keyfiyetli şekilde çalışması pek müin olğanını qayd etti. Bunıñ içün em yerli, yani KÇNN-dan Herson vilâyetiniñ eñ yaqın mesken yerlerinece, em de vilâyet seviyesindeki (yarımada ile qomşu olğan mesken yerlerinden vilâyet merkezine qadar) yollarnı keyfiyetli alğa ketirmek, mobil ve internet alâqasını eyileştirmek, iş yerlerini teşkil etecek yatırımcılarnı celp etmek, memleket içinde köçken şahıslarnı ve bu cümleden qırımtatarlarnı ev-mesken ile temin etmek kerektir.
Körüşüv esnasında qırımtatarlarnıñ Ukrainada tamır halq olğanları da unutılmadı. Al-azırda Prezident Ofisinde Qırımtatar Milliy Meclis ile muntazam şekilde strategik işbirlik meselesi muzakere etile, em vaqtınca işğal etilgen Qırımda, em Ukrainanıñ qıtasında yaşağan Meclis vekillerinen körüşüv planlaştırıla. Prezident Ukraina tamır halqlarınıñ, bu cümleden, qırımtatar halqınıñ statusını qanuniy seviyede pekitmek ve umimiy aqlarını qorçalamaq kerek olğanını qayd etti.
Bundan ğayrı, vaqtınca işğal etilgen topraqlarnı haberleştirüv meselesi muzakere etildi. Daimiy Temsilci yoldaş vastasınen köstergen ukrain kanallarınıñ blok etilmesi neticesinde vaqtınсa işğal etilgen topraqlarınıñ sakinleri ukraina televizion kanallarını seyir etip olamağanlarına, ukrain matbuat vastalarından haber alamağanlara Devlet başlığınıñ diqqatını celp etti. Volodımır Zelenskıy milliy havfsızlıq ile bağlı olğan işbu mesele eñ yüksek devlet seviyede baqılacağını qayd etti. Bundan ğayrı o, vaqtınca işğal etilgen topraqlar içün çalışacaq yañı devlet televizion kanalı teşkil etilecegi aqqında haber etti. Qırım sakinlerine tolu şekilde malümat bermek maqsadınen, kanal tek haber ve cemaat-siyasiy mündericenen yetinmeycek, eglenceli ve medeniy yayınları da olacaqtır.
Bundan ğayrı, Volodımır Zelenskıy Qırım MC ve Aqyar şeeriniñ işğal etilmeleriniñ 6 yıllığına bağışlanğan tedbirlede, bu cümleden, kiçik ay (fevral) 26 künü ”Olimpiyskiy” MSK-de keçirilecek «Age of Crimea» VI Halqara forumında iştirak etecegini tasdıqladı. Ukraina Prezidentiniñ başqa tedbirlerde iştirak etmesi onıñ Ofisi ile muzakere etilmekte.
Fotosüretler: Ukraina Prezidentiniñ İnternette resmiy temsilciligi