2018 senesi qural ay (mayıs) 24 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar ve uquqiy talil hızmetleriniñ vekilleri iş muşaveresi şekilinde Ukraina sağlıq saqlav Naziri Ulâna Suprun ve nazirlikniñ terkibindeki idarelerniñ yolbaşçıları ile  körüştiler. Körüşüv esnasında Qırımda yaşap kelgen Ukraina vatandaşlarına birinci, ekinci ve üçünci nevbet yardımınıñ berülüvi, bu adamlarnı ve Qırımdan memleket içinde köçken şahıslarnı tedaviylegen hastahanelerni maddiy teminlev, vaqtınca işğal etilgen Qırımda yaşağan vatandaşlarnıñ tıbbiy-içtimaiy teşkerüviniñ hususiyetleri, Ukraina sağlıq saqlav Nazirligi terkibinde bulunğan oquv yurtlarında Qırımnıñ sakinleri içün aliy tasil aluv imkânları muzakere etildi. Qırımdan kelip, memleket içinde köçken şahıs statusında bulunmağan Ukraina vatandaşlarına tıbbiy yardım bergen sağlıq saqlav müessiselerge qoşma subventsiyalarnı berüv, bu şahıslar ve ekimler arasında añlaşmalarnı imzalav meseleri de köterildi. Körüşüvniñ neticesi olaraq, yüklengen vazifelerni yerine ketirüv içün işbrilikniñ ameliy algoritmi belgilendi.