2018 senesi çiçek ayı (aprel) 6 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar ve uquqiy talil hızmetleriniñ hadimleri iş keñeşi şekilinde Ukraina Tasil ve ilim naziri Liliya Grineviç, nazir muavini Roman Gleba, Ukraina Tasil ve ilim nazirigi bölükleriniñ reberleri ile körüştiler.
Körüşüv devamında Qırımdan memleket içinde mecburen köçken şahıslarnıñ ve Qırımda yaşağan Ukraina vatandaşlarınıñ tasil aqlarına riayet etüv meselesi, olarnı 2018-2019 seneleri kiriş kampaniyası aqqında haberdar etüv muzakere etildi. Bundan da ğayrı, Ukraina temel halqlarınıñ tasil aqlarınıñ qorçalavı meselesi köterildi.
Ukrainanıñ vaqtınca işğal etilgen Qırım topraqlarındaki aliy oquv yurtlarınıñ qıta Ukrainağa köçürilmesine, olarnıñ litsenziyalarnıñ yañılmasına ayrıca diqqat etildi. Bundan da ğayrı, Qırımda qanunsız teşkil etilgen aliy oquv yurtlarğa ve Qırımda çalışqan rusiye aliy oquv yurtlarınıñ filiallarına qarşı sanktsiyalar kirsetmek kerek olğanı qayd etildi.
Körüşüvniñ neticesinde taraflar kelecekte işbirlik aqqında añlaştılar.