Ukraina Prezidenti Petro Poroşenkonıñ Ukrainada eki künlik resmiy ziyaretnen bulunğan Almaniya Federativ Cumhuriyetiniñ Federal Prezidenti Frank-Valter Ştanmayer ile körüşüvi devamında Rusiyede ve işğal etilgen topraqlardaki apishanelerde bulunğan ukrain reinelerni azat etüv meselesi muzakere etildi. ‘‘Şubesiz ki, ukrain reinelerniñ, işğal etilgen topraqlarda bulunğan reinelerniñ azat etilüvine mahsus diqqat ayırdıq. Bıltır ilk qış ayında keçirilgen muvafaqıyetli ameliyattan soñ olarnı azat etüv ceryanı Rusiye Federatsıyası ve oña boysunğan aydutlar tarafından toqtatıldı’’, – dep bildirdi Almaniya Federativ Cumhuriyetiniñ Federal Prezidenti Frank-Valter Ştanmayer ile beraberlikte keçirgen matbuat konferentsiyası devamında Ukraina Prezidenti Petro Poroşenko. ‘‘Em işğal etilgen topraqlarda tutulğan ukrain askerlerni, ukrain faalci ve göñüllilerni, em de işğal etilgen Qırımda ve Rusiye Federatsıyasınıñ apishanelerinde bulunğan siyasiy mabuslarnı, bu cümleden, Oleg Sentsovnı, Roman Suşçenkonı, Volodımır Baluhnı ve yalıñız ukrain pasportından vazgeçip rusiye vatandaşlığını qabul etmege istemegenleri içün apishanelerde maküm etilgen başqa siyasiy mabüslerni eñ qısqa vaqıtta azat etmege talap etemiz’’, – dep qayd etti Ukraina devletiniñ Başlığı.