Qanunğa binaen, vaqtınca işğal etilgen Ukraina topraqlarında yaşağan Ukraina vatandaşları karantin vaqtında ya da kiriş-çıqış nezaret etüv noqtaları çalışmağan arada Ukraina Nazirler Şurası tarafından belgilengen insaniy sebeplerden vaqtınca işğal etilgen Ukraina topraqlarına kiriş-çıqıs tertibini bozsalar, memuriy mesüliyetke çekilmeycekler.

Bu Qanunnıñ qabul etilüvi vaqtınca işğal etilgen topraqlarda yaşağan Ukraina vatandaşları içün pek müim bir haberdir. 2020 senesiniñ saban ayından başlap, işğalci devlet (COVID-19) tacmaraz hastalığınıñ darqaluvını manaçıq etip, daimiy şekilde Ukraina vatandaşlarınıñ vaqtınca işğal etilgen topraqlardan KÇNN vastasınen çıqmalarına yol bermey. Böyleliknen, vaqtınca işğal etilgen ORDLO ve Qırım MC topraqlarınen memuriy sıñırlardaki KÇNN-larnıñ ekseriyeti ya asla çalışmadı, ya da sıñırlı şekilde çalıştı. Şu sebepten Ukraina vatandaşları vaqtınca işğal etilgen topraqlardan qanuniy şekilde KÇNN vastasınen çıqıp olamadı.

Böyle vaziyette Ukraina vatandaşları vaqtınca işğal etilgen topraqlardan tek Ukraina-Rusiye sıñırındaki keçit noqtalarından çıqıp ola ediler. Ameldeki qanuniyetke köre ise bu şekilde vaqtınca işğal etilgen topraqlarğa kiriş-çıqış tertibini bozğan şahıs memuriy mesüliyetke çekilip, 1,7 biñden 5,1 biñge qadar cöreme tölemeli (Memuriy bozuvlarğa dair Ukraina kodeksiniñ 2042 maddesi).

Vaqtınca işğal etilgen topraqlarnıñ sakinleri öz nevbette tıbbiy yardım ya da pension tölevlerini almaq, vesiqalarını resmiyleştirmek, aliy oquv yurtlarında oqumaq kibi çeşit türlü sebeplerden Ukraina idaresi altında bulunğan topraqlarnı ziyaret etmeliler. İşğalci devletniñ areketlerinden sebep ise başqa çareleri olmağan on biñlernen Ukraina vatandaşları vaqtınca işğal etilgen topraqlardan Ukraina qanuniyetini bozıp çıqmağa mecburlar.

Qabul etilgen qanun, mecburen Ukraina qanuniyetini bozıp, vaqtınca işğal etilgen topraqlardan çıqqan Ukraina vatandaşlarına qarşı cöremeler ile başqa cezalavlarnı lâğu ete. Bu kibi müim adım vaqtınca işğal etilgen topraqlarda yaşağan Ukraina vatandaşlarınıñ aq-uquqlarını qorçalar ve olarnıñ başqa Ukraina regionlarınen bağlarınıñ üzülmesine yol bermeyip, işğalci devletniñ niyetlerini bozar!