Oraq ayınıñ 12-de Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç insan aqları, vaqtınca işğal etilgen Donetsk ve Lugansk vilâyetlerinde, Qırım Muhtar Cumhuriyetininde ve Aqyar şeerindeki Ukraina topraqlarını işğalden azat etüv ve ğayrıdan integratsiya etüv, milliy azınlıqlar ve halqara munasebetler meseleleri boyunca Ukraina Yuqarı Şurası Komiteti tarafından teşkil etilgen «”Habersiz ğayıp olğan şahıslarnıñ uquqiy mevamı aqqında” qanunını yerine ketirüv üzerinde parlament nezareti» mevzusında tögerek masada iştirak etti.

Tögerek masa esnasında ”Habersiz ğayıp olğan şahıslarnıñ uquqiy mevamı aqqında” Ukraina qanunını yerine ketirüv boyunca devlet akimiyeti organları, halqara ve milliy cemaat teşkilâtları maruzalarınen çıqışta bulundı. Bundan ğayrı, yuqarıda añılğan qanunnı yerine ketirüvnen bağlı problemli meseleler ekspertler tarafından muzakere etildi.

Anton Korınevıç çıqışında silâlı dava şaraitlerinde ğayıp olğan, fevqulâde vaziyetlerde ğayıp olğan şahıslarnıñ, olarnıñ qoranta azalarınıñ aq-uquqlarını qorçalav, işbu şahıslarnı cedvelge aluv ve qıdıruv saasında devlet siyasetiniñ semereligini arttırmaq maqsadınen yuqarıda añılğan qanunğa ve habersiz ğayıp olğan şahıslarnıñ uquqiy mevamını belgilegen başqa normativ-uquqiy senetlerge deñişmeler kirsetmek kerek olğanını qayd etti.

Temsilcilik silâlı dava şaraitlerinde, fevqulâde vaziyetlerde, Ukraina topraqlarınıñ qısmen işğal etilüvi ve kütleviy şekilde isanlarnıñ elâk oluvına sebep olğan başqa adiseler neticesinde ğayıp olğan şahıslarnıñ uquqiy mevamını belgilevnen bağlı munasebetlerni uquqiy ceetten mükemmelleştirüvge qol tuta.