2018 senesi oraq ayı (iyül) 13 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Ukraina Yuqarı Şurası bücet komitetiniñ Andriy Pavelko yolbaşçılığında parlamentten tış oturışında iştirak etti. Körüşüvge Herson vilâyeti devlet memuriyetiniñ başlığı, Herson vilâyeti şurasınıñ başlığı, Qırımtatar Milliy Meclisiniñ reisi, merkeziy akimiyet organlarınıñ vekilleri davet etildi.

Parlamentten tış oturış çerçivesinde Komitetniñ yolbaşçısı Andriy Pavelko kün tertibinde eñ muim meselelerden biri Ukrainanıñ vaqtınca işğal etilgen Qırım toprağınıñ meselelerini çezüv olğanını qayd etti. Oturış esnasında toplaşuvda bulunğanlar vaqtınca işğal etilgen Qırım boyunca devlet siyasetiniñ esas maqsadınen bağlı olğan bir sıra meselelerni muzakere ettiler. İzet Gdanov öz çıqışı devamında bu yönelişnen bağlı problemalarnı tarif etti. Birinci muavin qayd etkenine köre, havfsızlıq saasında, başqa meselelernen bir sırada, Azaq-Qaradeñiz bölgesinde rusiye istilâsına qarşılıq köstermek içün Ukraina Arbiy Küçlerini ve uquq qorçalav organlarnı qoşma maaliye ile temin etmege kerek olacaq.

Bundan ğayrı, İzet Gdanov ayrı milliy ve halqara ticariy ağlarınıñ Qırımda çalışuvı, Ukrainanıñ nezareti altında bulunğan topraqlardan ilmenit kibi malzemelerniñ yarımdada arbiy, ya da eki maqsatlı mallarnı çıqarğan şirketlerge ketirilüvi şaraitlerinde iqtisadiy saada vaziyet pek kergin olğanını qayd etti. Mesele şunda ki, bu bozucı ceryanlardan kârnı ahır-soñunda alğanlar al-azırda halq deputatları vazifesini becergen şahıslar olıp, Qırım boyunca Ukraina devlet siyasetine tesir ete bileler.

Birinci muavin toplaşuv iştirakçilerniñ diqqatını ayrıca Qırımdan memleket içinde köçken şahıslarnı, bu cümleden, siyasiy mabuslarnıñ qoranta azalarını mesken ile teminlev meselesine çekti, çünki bu saada vaziyet pek kergin olıp, bücetten maaliyege muhtaç. Mevcut olğan içtimaiy yataqhanelerni tamirlep, yañılarnı da qurmağa kerek.

KÇNN-nıñ abadanlaştıruvına kelgende ise, İzet Gdanov Ukraina Prezidentiniñ Qırım MC nasıldır sebeplerden ‘‘Qalançaq’’ ve ‘‘Çonğar’’ KÇNN-nıñ abadanlaştırıluvı boyunca muzakere etilgen leyha üzerinde çalığmağa davet etilmegenini qayd etti. Birinci muavin teklif etilgen leyhalarnıñ şimdiki mündericesi siyasiy, havfsızlıq, uquq qorçalav ceetten zayıf ve faydasız olğanını, olar üstünde daa çalışmaq kerek olğanını qayd etti.

Yuqarıda añılğan leyhalar vaqtınca işğal etilgen Qırım MC ve Aqyar şeeri boyunca Ukraina ükümeti tarafından 2018 senesi saban (mart) ayı 28 künü qabul etilgen avalesinen belgilengen içki devlet siyasetiniñ bazı vazifelerini yerine ketirüvniñ bir şekili olabilecegi içün İzet Gdanov şunı qayd etti ki, Temsilcilik bir qaç kere muracaat etkenine baqmadan, icra akimiyetniñ mütenasip organları tarafından nasıldır sebeplerden bu plannıñ leyhası üstünde çalışuvğa davet etilmedi ve atta bu tedbirlerniñ icracilerinden biri olaraq tayin etilmedi.

Böyle vaziyette İzet Gdanov Ukraina Baş nazirine yuqarıda qayd etilgen avalege ve planğa Ukraina Prezidentiniñ Qırım MC Temsilciligini celp etilüvi boyunca deñişmeler kirsetmek ricasınen muracaat etmege teklif etti.