2018 senesi çiçek ayı (aprel) 5 künü Ukraina Prezidentiniñ Qırım MC Daimiy Temsilcisi Borıs Babin iş keñeşi şekilinde Ukrainada AHIT Mahsus nezaret etici missiyası Herson taqımınıñ reberiyetinden Piter Çilvers ve Syüzen Stemper ile körüşti. Körüşüv devamında Ukrainanıñ vaqtınca işğal etilgen topraqlarınen memuriy sıñırnıñ civarında tertip ve hafsızlıqqa riayet etilmesinen bağlı bir sıra mesele, bu cümleden, Ukrainanıñ vaqtınca işğal etilgen topraqları yaqınında Milliy Politsiya Qırım MC ve Aqyar şeerinde Baş idaresiniñ bölükleri tarafından olar içün bügünde-bügün ‘‘Çonğar’’ ve ‘‘Qalançaq’’ KÇNN-da teşkil etilgen iş yerlerinde operativ-hızmet faaliyetniñ yürsetilmesi muzakere etildi.
Qanunsız şekilde RF bayrağınen qullanıp, açıq-aydın sürette vaqtınca işğal etilgen topraqlarınen devlet sıñır tertibini ve balıqçiliq kvotalarnı bozğan, Ukrainanıñ nezareti altında bulunğan Azaq deñizniñ suvlarında balıqçılıqnen oğraşğan ve böyleliknen devletke büyük maddiy ziyan ketirip keçenlerde Ukraina Devlet Sıñır tarafından yaqalanğan ukrain ‘‘Nord’’ gemisi misalinde halqara deñizcilik uquqnıñ, balıqçılıq saasında ekitaraflı añlaşmalarnıñ ve Ukraina qanuniyetiniñ bozuluvı muzakere etildi.
Ukrainada AHIT Mahsus nezaret etici missiyanıñ analitik vesiqalarında vaqtınca işğal etilgen topraqlarınen sıñırındaki vaziyet, memleket içinde mecburen köçken şahıslarnıñ ve vaqtınca işğal etikgen Qırımda yaşağan Ukraina vatandaşlarınıñ emek, içtimaiy, mesken, tasil ve memuriy hızmetler saalarında aq-uquqlarına riayet etüv, adaletni tiklev ve makeme davalarnı cezüv kibi meseleler sübetniñ esas noqtaları oldılar.
Borıs Babin körüşüvde bulunğanlarnı Qırımdan memleket içinde mecburen köçken şahıslarnı Ukrainanıñ çeşit yerlerinde vaqtınca mesken ile temin etüv, olarnı yerli cemiyetlerniñ içtimaiy ayatına integratsiya etüv ve yañı iş yerlerine yerleştirüv kibi saalarda temsilcilikniñ yönetici faaliyetinen qısqa şekilde tanıştırdı. Qırımdaki işğalci akimiyetniñ menfiy tesirini aşmaq maqsadınen yürsetilgen vazifelerini semereli şekilde yerine ketirmek içün taraflar işbirlik ve kerekli malümatlarnen paylaşuv aqqında anlaştılar.