2018 senesi ekim (oktâbr) ayı 23 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova Ukrainada BMT Daimiy Temsilcisi Osnat hanım Lubrani ve barışıq ve inkişaf meseleleri boyunca Ukrainada BMT tevsiyecisi Stan Veytsman ile iş körüşüvini keçirdiler.

Körüşüv esnasında taraflar Qırımğa yaqın olğan rayonlarda memuriy hızmet merkezleriniñ açıluvı, qırımlı siyasiy mabuslarnıñ qorantalarına ve Qırımdan kelgen Ukraina vatandaşlarına olarnıñ muayyen meselelerini çezüvde Temsilcilik tarafından kösterilgen yardım, qırımlılar içün tasil leyhaları kibi bir sıra gumanitar meselelerni muzakere ettiler.

Borıs Babin vaqtınca işğal etilgen Qırımğa yaqın olğan rayonğa qanuniy avtomobil naqliyatını ve doğru ketken demiryol naqliyatını teşkil etmek kerek olğanını qayd etti. Körüşüvniñ isitrakçileri vaqtınca işğal etilgen Qırımdaki Ermenibazar (Armânsk) şeerinde devam etken ekologik buhrannı muzakere ettiler.

Körüşüvniñ neticesi olaraq, Ukraina tarafından BMT Nezaret etici missiyasınıñ tevsiyelerini semereli şekilde yerine ketirmek maqsadınen keçirile bilecek umumiy tedbirlerniñ istiqbali muzakere etildi.