2018 senesi boş ay (noyabr) 15 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ hadimleri ‘‘Ukrainada memleket içinde köçken şahıslarğa pensiya tölevleri: qanuniy pensiya aqqını nasıl yerine ketirmeli?’’ mevzusında halqara konferentsiyada iştirak ettiler.

Konferentsiyada Ukrainada Büyük Britaniyanıñ Fevqulâde ve Vekâletli Elçisi Cüdit Gof, Ukrainada BMT insan aqları boyunca Nezaret etici Missiyanıñ reisi Fiona Freyzer, BMT qaçaqlar işleri boyunca Yuqarı Komissar İdaresiniñ vekil muavini Noyel Kalgun, Ukraina içtimaiy siyaset Naziriniñ muavini Mıkola Şambir, Ukraina Pension Fondu İdare başlığınıñ muavini İrına Kovpaşko, ‘‘Memleket içinde köçken şahıslar meseleleri boyunca muşavir’’ (“Stabilization Support Services”) leyhasınıñ yöneticisi Valeriya Verşinina, ‘‘Maliye sektorını deñiştirüv’’ USAİD leyhasınıñ eksperti Volodımır Yatsenko, Vaqtınca işğal etilgen topraqlar ve memleket içinde köçken şahıslar meseleleri boyunca Nazir muavini Georgiy Tuka, Ukraina halq deputatı, Ukraina Yuqarı Şurası içtimaiy siyaset, meşğullik ve pensiya ile teminlev meseleleri boyunca Komitet reisiniñ Birinci muavini Sergiy Kaplin, cemaat teşkilâtlarınıñ, devlet akimiyeti organlarınıñ, vilâyet devlet memuriyetleriniñ, halqara teşkilâtlarınıñ vekilleri, halqara ekspertler ve matbuat vastaları iştirak etti.

Konferentsiya esnasında Ukrainada memleket içinde köçken şahıslarnı teminlev ve qorçalav meseleleri, bu cümleden, pensiya aqqına riayet etüv muzakere etildi. Konferentsiya iştirakçileri milliy ve halqara qanuniyet ceetlerinden memleket içinde köçken şahıslarnıñ qorçalanuv seviyesini muzakere ettiler. Bundan da ğayrı, cemaat vekilleri Ukrainada memleket içinde köçken şahıslarnıñ qorçalavındaki nuqsanlıqlarnı tüzetüv yolları boyunca öz fikirlernen paylaştılar.