2018 senesi saban ayı (mart) 23 künü Ukraina Prezidentiniñ Qırım MC Temsilciligindeki uquqiy talil hızmetiniñ başlığı Anatoliy Çehun ve Temsilcilikniñ halqara alâqalar ve uquqiy talil hızmetleriniñ baş mesleatçıları ‘‘Ukrainada memleket içinde mecburen köçken şahıslarnıñ mulkiyet aqları’’ mevzusında tögerek masada iştirak ettiler.

Tögerek masada Kassatsion memuriy makemesiniñ (KMM) başlığı ve makemecileri, KMM içtimaiy aqlarnıñ qorçalavınen bağlı işlernen oğraşqan makeme meclisiniñ kâtibi, Ukrainada BMT İnsan aqları boyunca közetüv taqımınıñ başlığı ve mütehassısları, ‘‘Ukrainada memleket içinde mecburen köçken şahıslar insan aqlarınıñ qorçalavınıñ quvetleştirilmesi’’ Avropa Şurası leyhasınıñ başlığı, yöneticileri ve mesleatçıları, İnsan aqları boyunca Avropa makemesiniñ Vekâletlisi Kâtibiyetiniñ idare başlığı, Ukraina Pension Fondunıñ idare başlığı, Ukraina Pension Fondu adliye bölüginiñ müdiri, Mülkiyet meseleleri, mesken ve topraq aqları boyunca tehnikiy iş gruppasınıñ yöneticisi, Ukrainada AHIT leyhaları Yöneticisiniñ uquqiy islâat meseleleri boyunca leyhalarnıñ başlığı, İnsan aqları boyunca BMT Yuqarı komissarı İdaresiniñ Temsilciliginde uquqiy meseler boyunca mesleatçı da iştirak ettiler.

Tögerek masa devamında Ukrainada memleket içinde mecburen köçken şahıslarnıñ mülkiyet aqlarına riayet etüvnen bağlı meseleler, yoq etilgen mülküyetniñ tazminatı, yuqarıda qayd etilgen aqlarnıñ semereli uquqiy qorçalavı içün milliy ve halqara mehanizmler muzakere etildi.

İştirakçiler çetel tecribesini, halqara standartlarnı ve memleket içinde mecburen köçken şahıslarnıñ mülkiyet aqlarınıñ qorçalavı saasında İnsan aqları boyunca Avropa makemesiniñ ameliyatını talil ettiler.

Tedbir devamında memleket içinde mecburen köçken şahıslarnıñ mülkiyet aqlarına riayet etüvinen bağlı meseleler qayd etildi ve işğal etilgen ve Ukrainanıñ nezareti altında bulunğan topraqlarda mesken ziyanınıñ tazminatı mehanizmi muzakere etildi. Ukrainanıñ vaqtınca işğal etigen Qırım topraqlarında yaşağan, ya da memleket içinde mecburen köçken şahıslarnıñ mülkiyet aqlarına riayet etüvniñ közetüvi ve Temsilcilikke vatandaşlardan muracaatlarnıñ talili esasında aşağıdaki saalarda problemalar mevcut olğanı belgilendi. Birinci nevbette bu, işğalniñ başında Qırımda yaşağan yatırımcılarğa depozit emanetleriniñ qaytarıluvı. Vaqtınca işğal etigen topraqlardan Ukrainanıñ diğer qısımlarına ve qarşı tarafqa şahsiy mal-mülkni avuştırmaq aqqına riayet etüv de aktual mesele olmağa devam ete. Bedava ekinci nevbetteki yardımını qullanaraq vaqtınca işğal etilgen Qırım MC topraqlarında yaşağan vatandaşlarınıñ mülkiyet aqlarınıñ makeme ceryanında qorçalavı meselesi de alâ daa çezilmedi.

Memleket içinde mecburen köçken şahıslarnıñ mülkiyet aqlarına riayet etmek maqsadınen Temsilcilikniñ mütenasip qanun leyhaları üzerinde çalışuvı muzakere etildi.