Oktyabr 28 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin, Qırımtatar Milliy Meclis reisi Refat Çubarov ve Qırımtatar Milliy Meclis reisiniñ muavini İlmi Umerov ile beraberlikte (Skayp vastasınen) Ukrainalılarnıñ Umumcian Kongresi yanında Koordinatsion şurasınıñ ”Qırımnı işğalden azat etilmesi meselesinde Ukrainanıñ dernekleri ile işbirligi: insan aq-uquqlarnıñ qorçalanması ve halqara destek” serlevalı oturışında iştirak etti.
Daimiy Temsilci Koordinatsion şurasına Temsilcilikniñ vazifelerini tarif etip, soñki eki ay devamında alınıp barılğan faaliyetinen tanıştırdı. Daimiy Temsilci qayd etkenine köre, Ukraina Prezidenti bergen avale ve vazifelerni becermeq maqsadınen Temsilcilikniñ halqara alâqaları qaviyleştirildi.
Boris Babin Qırımnıñ işğalden azat etilmesine yonelgen derneklerniñ izçen ameliy tedbirlerine ayrıca diqqat ayırdı.
Qırım aqqında malümatlarnı resmiy menbalardan ve umummillet matbuat vastalardan dernekler tarafından yerli tillerge çevirip darqatuv yolları muzakere etildi. Dernekler yaşağan memleketlerde İnternet vastasınen bildirüv meydançıqlarını teşkil etmeğe kerek olğanını da añıp keçtiler.
Boris Babin derneklerniñ temsilcilerini yaşağan memeleketlerinde umummillet, regional ya da yerli akimiyetiniñ, matbuat vastalarınıñ, büyük tücariy teşkilâtlarnıñ, oquv yurtlarınıñ Qırım aqqında noqta-i nazarları boyunca közetüv keçirmege çağırdı. İşbu memleketlerde ticariy teşkilâtlarnıñ Rusiyege qarşı kirsetilgen sanktsiyalarğa riayet etmeleriniñ közetüvine ve sanktsiya talabı bozulğan alda Ukraina cemaat teşkilâtlarınıñ teşşebüslerine binaen uquqiy taqiqat yapılması kerekligine ayrıca diqqat ayırıldı. Etnik ukrainalılar Qırımnıñ tamır halqlarınıñ AQŞ-ında, Türkiyede, Orta Asiya, Baltıq, Balkan memleketlerinde ve Merkeziy Avropada bulunğan dernekleri ile, hususan Ukrainanıñ tamır halqlarınıñ temsilcilerine Ukrainanıñ sıñırları tışında yaşağan ukrainalılar statusını almağa yardım etmek maqsadınen işbirlik qurmağa kerek olğanı belgilendi.
Boris Babin Ukrainanıñ sıñırları tışında yaşağan ukrainalılarnı ve olarnıñ teşkilâtlarını Qırım mevzusına bağışlanğan konferentsiyalarda ve halqara devlet ve cemaat teşkilâtlar, gumanitar ve maarif müessiseler tarafından teşkil etilgen diger tedbirlerde de faal şekilde iştirak etmege çağırdı.