Ukraina Prezidenti Petro Poroşenko 2018 senesi boş ay (noyabr) 26 künü ‘‘«Ukrainanıñ egemenligini ve topraq bütünligini temin etüv boyunca fevqulâde tedbirler ve Ukrainada arbiy vaziyetni ilân etüv» aqqında Ukraina milliy havfsızlıq ve mudafaa şurasınıñ qararı aqqında’’ №390/2018 fermanı ile MHMŞ-nıñ işbu qararını amelge keçirdi.
MHMŞ-nıñ qararı ile Rusiye Federatsiyasınıñ Ukraina Arbiy-deñiz quvetleriniñ gemilerine qarşı ağır neticelerge ketirgen areketleri BMT Baş assambleyası 1974 senesi ilk qış ayı 14 künü qabul etken 3314 (XXIX) sanlı Rezölütsiyasınıñ 3 maddesindeki ‘‘c’’ ve ‘‘d’’ bölüginde aks etilgen silâlı tecavüziy cinayettir.
Vesiqada milliy havfsızlıqnı temin etmek, silâlı istilâğa qarşılıq kösterüv içün şaraitler yaratmaq, Ukrainanıñ topraq bütünligi, egemenligi ve mustaqilligi ögünde turğan telükelerni yoq etmek maqsadınen Ukrainada mahsus uquqiy tertipni amelge keçirmek kerekligi qayd etile
Yuqarında añılğan Qarar ile Ukraina çetel işler Nazirligine 1994 senesi ilk qıs ayı 5 künü imzalanğan Añlaşma boyunca özek silânı darqatmamağa vade etken Ukrainağa Memorandum boyunca havfsızlıq kefil etken devletlerge Rusiye Federatsiyasınıñ Ukrainağa qarşı silâlı tecavüz areketleri boyunca deral muzakereler keçirmege teklifinen muracaat etmege; BMT Hafsızlıq Şurasını, Avropada Havfsızlıq ve İşbirlik Teşkilâtı Daimiy Şurasını acele sürette toplaşuvğa çağırmağa, Ukraina Prezidentiniñ, Ukraina çetel işler Naziriniñ ortaq devletlerniñ, Avropa Birliginiñ yolbaşçıları, BMT, AHİT, başqa halqara teşkilâtlarnıñ reberiyeti ile aqıl tanışuvlarını teşkil etmege avale etile.
Ukraina çetel işler Nazirligi, Ukraina haber siyaseti Nazirligi çetel devletlerniñ, tesirli halqara siyasiy, iqtisadiy, cemaat teşkilâtlarınıñ reberiyertlerine Rusiye Federatsiyasınıñ Ukrainağa qarşı nevbetteki silâlı tecavüz areketleri aqqında kerçek haberlerni bildirmek maqsadınen acele sürette mütenasip haber kampaniyasını teşkil etmeliler.
MHMŞ Ukraina içki işler Nazirligine, Ukraina havfsızlıq Hızmetine cemaat tertipniñ, strategik infraterkip obyektleriniñ, diplomatik temsilcilikleriniñ qorçalannasını ve mudafaasını temin etmek maqsadınen acele sürette kerekli tedbirlerni keçirmege, Ukraina devlet sıñır hızmeti memuriyetine ise Rusiye Federatsiyası ile devlet sıñırınıñ qorçalanmasını quvetleştirmege avale etti.
MHMŞ-nıñ«Ukrainanıñ egemenligini ve topraq bütünligini temin etüv boyunca fevqulâde tedbirler ve Ukrainada arbiy vaziyetni ilân etüv» aqqında Qararında icra akimiyetniñ mütenasip organlarına, arbiy komandanlıqqa, uquq qorçalav organlarına devlet akimiyeti, öz-özüni idare etüv organları, şirketler, idareler ve teşkilâtlar Ukrainanıñ topraq bütünligine riayet etüv ve telükelerniñ ögüni aluv boyunca vekâletlerini becermeleri içün kerekli şaraitler yaratmağa avale etile.