2018 senesi saban ayı (mart) 30 künü Ukraina Prezidentiniñ Qırım MC Temsilciliginde uquqiy talil hızmetiniñ baş mesleatçısı Oleg Butrey ‘‘Deñiz qıdıruv-qurtarıcı hızmeti’’ Devlet muessisesi temelinde Ukrainanıñ mesüliyetinde olğan zonada, hususan, Qırım yarımadasınıñ etrafındaki deñizde ve Ukrainanıñ (deñiz) iqtisadiy zonasına kirgen Qırım yarımadasınıñ yalısı ve yalığa yaqın olğan qıta Ukrainanıñ kontinental şelfiniñ boyunda gemilerniñ nezareti meselesi mevzusında keçirilgen seminarda iştirak etti.

Seminarda Ukraina Qırım MC-de Savcılığınıñ, Ukraina Cenübiy regionınıñ Arbiy savcılığınıñ, Ukraina Havfsızlıq hızmetiniñ Qırım MC-de Baş idaresiniñ temsilcileri, qıdıruv ve qurtaruv boyunca müdir muavini vazifesini vaqtınca becergen şahıs, qemilerniñ uzaqtan tanılması ve bulunğan yerleriniñ nezareti boyunca Milliy merkeziniñ müdiri ve ‘‘Deñiz qıdıruv-qurtarıcı hızmeti’’ Devlet muessisesinde alâqa hızmetiniñ müdiri iştirak ettiler.

Toplaşuv devamında gemi areketleriniñ nezareti meselesi, olarnıñ tanılması ve Deñizde insan ayatınıñ qorçalavına bağışlanğan halqara Konventsiya boyunca mecburiy sürette qullanılğan Avtomatik informatsion sisteması (AİS) ve yüksek sıqlıq radio dalğalar vastasınen gemilerniñ büyüklikleriniñ, yönelişleriniñ ve başqa malümatlarınıñ belgilevi muzakere etildi.

Toplaşuvnıñ neticesi olaraq, seminarnıñ iştirakçileri Qırımnıñ etrafında gemicilik mevzusında Avtomatik informatsion sisteması yardımınen statistik, dinamik ve istiqamet aqqında malümatlarnıñ toplanuvı ve qullanıluvı boyunca bir fikirge keldiler.