2017сенеси апрельнинъ 4  Херсонда Къырым Мухтар Джумхуриетинде Украина Президентининъ Даимий Векили Наталия Попович Украинада Френкистаннынъ Февкъульаде ве Векялетли Эльчиси Изабель Дюмон иле корюшти.

Корюшюв кетишатында тарафлар вакътынджа ишгъаль этильген Къырым Мухтар Джумхуриети ве Акъяр шеэри территорияларындаки вазиет  акъкъында лаф юрсеттилер.

Энъ эвеля, Къырым ярымадасында ишгъаль акимиети тарафындан инсанларнынъ акъ-укъукълары ве темель азатлыкълары бозулув меселеси боюнджа музакере эттилер.

Эсас дикъкъатыны субетдешлер ички юрьме шахыслары суалине айырдылар. Къырым Мухтар Джумхуриетинде Украина Президентининъ  Даимий Векили Украинанынъ вакътынджа ишгъаль этильген территориясындан чыкъып къыта къысымында ерлешкен ватандашларнынъ янъы шараитлерге адаптирлемеге ярдым этильмесинен багълы олгъан девлет сиясетнинъ девам олунмасынынъ эмиетини къайд этти.

Корюшюв кетишатында, Наталья Попович  Изабель Дюмон ханымны Векялетхане тарафындан алып барылгъан ишлеринен таныштырды ве френкистан тарафына Украинагъа авропалы инкишафына ынтылувында, барышыкъ тесбит этювинде, мемлекетнинъ мустакъиллик ве топракъ бутюнлигини гъайрыдан тиклемесинде къол туткъанларына тешеккюрлер бильдирди.