2018 senesi ekim (oktâbr) ayı 17 künü Temsilcilikteki halqara alâqalar hızmetiniñ reisi Yevgen Samuha qırımtatarlarnıñ sovet zamanı sürgünliginden Qırımdaki tuvğan evlerine qaytarıluvı içün faal küreşken ukrain uquq qorçalayıcı Petro Grıgorovıç Grıgorenkoğa bağışlanğan hatıra aqşamında iştirak etti.

‘‘Qırım evinde’’ keçirilgen tedbir esnasında ‘‘General – uquq qorçalayıcı Petro Grıgorenko’’ vesiqalı film numayış etildi, aqşamnıñ iştirakçileri Petro Grıgorovıçnıñ şahısı ve dünyabaqışınıñ deñişüvi, sovet generalından sovet tertibiniñ barışılmaz muhalefetçisine qadar mürekkep ayat yolu boyunca öz hatırlavlarınen ve fikirlerinen paylaştılar. Bu cümleden, Qırımtatar halqınıñ meseleleri boyunca Ukraina Prezidentiniñ yardımcısı Mustafa Cemilev general ile şahsiy tanışlıqtan ve qırımtatar milliy ruhında, sovet rejimine qarşılıq kösterüv boyunca beraberlikte yapqan faaliyetten teessuratları ile paylaştı. Qırımtatar Milliy Meclisiniñ reisi Refat Çubarov Petro Grigorenkoniñ Ukraina devletiniñ qurucılığındaki rölüne diqqat ayırdı, işbu uquq qorçalayıcınıñ mirası Qırım içün küreşmege azır olğan zemaneviy siyasiy milletniñ şekillendirilüvine hızmet etkenini qayd etti.