2021 senesi saban ayınıñ 9-da Vladıslav Yesıpenko Aqmescit şeerinde Taras Şevçenkonıñ doğğan künü munasebetinen keçirilgen tedbirlerni ziyaret etken edi. Tedbirden soñ saban ayınıñ 10-da o, işğalci memuriyet vekilleri tarafından yaqalandı, ve saban ayınıñ 12-de Rusiye Federatsiyasınıñ işğalci memuriyetine boysunğan sözde ”Kıyiv rayon mahkemesi” V.Yesıpenkonıñ 2 ayğa, yani qural aynıñ 11-nece, tevqif etilgeni aqqında ”qarar” çıqardı. Yaqalanğan vatandaş qanunsız şekilde ateşli silâni, onıñ esas qısımlarını istisal etüv, yañıdan yapuv ya da tamir etüvde ve patronlarını istisal etüvde qabaatlandı.
Al-azırda Ukraina vatandaşı Vladıslav Yesıpenko aslında qorçalav aqqından marum etilgen alda buluna, çünki bu vaqıt içinde mustaqil abulqatlar onı tek bir kere ziyaret ete bildi. Oña qarşı taqiqatnı alıp barğanlar qanunsız usullarnı ve qıynavlarnı işleteler.
Saban ayınıñ 16-da Rusiye Federal Havfsızlıq Hızmeti Vladıslav Yesıpenkonıñ ”Ukraina mahsus hızmetleriniñ menfaatlarına çalışıp, istihbarat-zarar ketirici faaliyetnen oğraşqanını”, yani ”Qırımda insanlarnıñ kütleviy şekilde bulunğan yerlerniñ, yaşayışnı temin etüv yerlerniñ fotoresimler ile videosını çıqarğanını” ilân etti.
Çiçek ayınıñ 7-de ”Azatlıq Radiosı”, ”Qırım.Aqiqat” leyhasınıñ jurnalistleri mustaqil abulqat vastasınen Vladıslav Yesıpenkodan kelip çıqqan izaatlarnı yayınladı, bundan soñ abulqat tarafından imayesi altında bulunğan vatandaşnıñ ziyaret etilmesi kene yasaq etildi.
Yesipenkonıñ Qırım.Aqiqat tarafından yayınlanğan izaatlarından: ”Men, Vladıslav Yesıpenko, Aqmescitten Aluştağa öz arabamnen qaytayatqan vaqıtta tintüvden soñ Rusiye Federal Havfsızlıq Hızmeti (FSB) hadimleri tarafından yaqalanğan edim. ”Skoda Fabia” markalı arabamnıñ içine FSB hadimleri granata ketirip taşlağanlar. Tintüvden soñ men bir-de-bir vesiqalarımnı köstermekten red ettim, amma meni başqa yerge alıp ketip, anda maña er şeyni imzalatacaqlarını bildirdiler. Bundan soñ başıma çuval kiysetildi, meni arabağa oturtıp, tahminen bir saat içinde pencereleri olmağan bir mağazğa alıp keldiler. Bu mağazda FSB hadimleri meni zorbalıqnen anadan doğma alda qaldırıp soyundırdılar. Bundan soñ meni tabanğa yatqızıp, qulaqlarıma birer ilik taqtılar, telleriniñ ucları ordudaki TA-57 telefonına oşağan şeyge bağlı edi. Soñra ise tellerden aqım keçirdiler. Başım pek ağırğan edi, közlerim dersiñ ateş saçtı, miyim qaynağan dayın oldı. Böyle azaplar çekken soñ men özümni er türlü cinayetlerde qabaatlı tanımağa, er türlü kâğıtlarnı imzalamağa azır edim. Meni bütün gece boyu qıynadılar, Ukraina mahsus hızmetleri ile bağlı olıp-olmağanım aqqında sualler berdiler. Teneffüste meni ayaqyolğa alıp bardılar. FSB hadimleri meni de elektrik aqımnen qıynay, de kötekley edi. Em de başıma urmayıp, qursağıma, ayaqlarıma ve ayaqlarımnıñ arasına tepe ediler. Sabağace men kamera ögünde özümni qabaatlı tanıdım, nasıldır kâğıtlarnı imzaladım. Ekinci künü meni abulqatsız Ermenibazar şeeri etrafında keçirilgen taqiqat tedbirlerine alıp bardılar, anda maña granatanıñ sanki saqlı olğan gizli yerni kösterdiler. Bunıñ episi videoğa çıqarılğan edi. Bundan soñ FSB hadimleri maña hususiy abulqatnı tutmağa yasaq ettiler, aksi alda meni kene qıynacaqlar, amma kelecek sefer elektrika aqımlı tellerni qulaqlarıma degil de, cinsiy azalarıma iliştirecek ekenler.
Vladıslav Yesipenko taqip etilmesiniñ esas sebebi, ”Azatlıq Radiosı”, ”Qırım.Aqiqat” leyhasınıñ ştattan tış hadimi olaraq junalistik faaliyetidir.
Rusiye Federatsiyası sovet deviri siyasetni devam ete, fikir serbestligini sıñırlap, jurnalistlerni, blogerlerni ve içtimaiy ağlarnıñ adiy qullanıcılarnı taqip etip, dünyada vaqtınca işğal etilgen Qırım Muhtar Cumhuriyeti ve Aqyar şeeri topraqları aqqındaki haberlerniñ tek Rusiye propagandasından ibaret olğanını istey. Rusiye tasavur etken dünyada insan aqları kibi qıymetler içün yer yoq, onıñ yerine işğalnen razı olmağanlar içün qanunsız taqip etilüvler, çoq yıllıq ükümler ve insaniyetsiz şaraitlerde tutuluv bardır.
Vaqtınca işğal etilgen topraqlarda jurnalistik faaliyet yürsetkeni sebebinden Vladıslav Yesıpenkonıñ taqip etilmesi, onıñ qanunsız şekilde yaqalanuvı ve qıynavlarğa oğratılması halqara uquq şartlarını boza, dep sayamız.
Temsilcilik vaqtınca işğal etilgen Qırım Muhtar Cumhuriyeti ve Aqyar şeeri topraqlarında bulunğan Ukraina vatandaşlarınıñ qorçalanması oğrunda çalışmağa devam etecektir.