Tünevin, ekim ayınıñ 7-de, Ukraina Prezidentiniñ Qırım Muhtar Cumhuriyetindeki Temsilciliginde/Qırım platforması Ofisinde, mevzusı vaqtınca işğal etilgen Qırım Muhtar Cumhuriyeti, Aqyar şeeri ve olarnı işğalden azat etüv ve ğayrıdan integratsiya etüv oğunda devlet tarafından yapılğan adımlarğa bağışlanğan Ukrain siyasiy studiyalar mektebiniñ klubı – Qırım aqşamı olıp keçti.
Tedbirde Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve onıñ muavinleri Darya Svırıdova ve Tamila Taşeva çıqışta bulundılar.
Temsilcilik taqımı içün, devletimiz Rusiye Federatsiyası tarafından işğal etilgen Ukraina topraqlarını idaresi altına qaytarmağance, vaqtınca işğal etilgen Qırım yarımadası mevzusınıñ bütün mümkün olğan meydançıqlarnıñ kün tertibinden yoq olmaması müimdir.
”Bu maqsat ile Ukraina devam etken Qırım işğaline halqara cemiyet tarafından qıymet kesüvniñ semereligini arttırmaq, artqan telükelerge cevap bermek, Rusiye Federatsıyasına qarşı halqara basqını quvetleştirmek, insan aqlarınıñ bozulmasına yol bermemek, olarnıñ qurbanlarını qorçalamaq ve eñ büyük maqsadımızğa irişmek – Qırım Muhtar Cumhuriyetini ve Aqyar şeerini cenksiz azat etmek maqsadınen yañı halqara-konsultativ-koordinatsion formatını – qurucılıq Sammiti Kıyiv şeerinde 46 çetel devlet ve halqara teşkilât eyyetlerini toplağan Qırım platormasını teşkil etti. Bu, vaqtınca işğal etilgen Qırım üzerinde Ukrainanıñ egemenligini ğayrıdan tiklev yolunda birinci adımımızdır.
Al-azırda Qırım platformasınıñ içki trek çerçivesindeki faaliyeti, Temsilcilikniñ terkibinde ayrı bir bölük olaraq çalışıp, Ukraina devlet akimiyet organlarını, ecnebiy devletlerni, halqara teşkilâtlarnı ve Qırımda yaşağan Ukraina vatandaşlarını birleştirüv ve aralarında bağ tutuv içün daimiy sürette hızmet etecek bir meydançıqnıñ teşkil etilmesi ile devam ete” – dep qayd etti Anton Korınevıç.
Bundan ğayrı, spikerler Qırım platforması Ofisiniñ vazifeleri ve faaliyeti, Temsilcilik ögünde turğan esas çağıruvlar ve kelecek yıllarğa planları aqqında ikâye ettiler ve nasıl etip vaqtınca işğal etilgen Qırım Muhtar Cumhuriyetini ve Aqyar şeerini işğalden azat etmek ve ğayrıdan integratsiya etmek, Rusiye propagandasınıñ ögüni kesmek, vaqtınca işğal etilgen Qırım yarımadasında yaşağan Ukraina vatandaşlarına yardım etmek mümkün olğanını ve vaqtınca işğal etilgen Qırımnı ne içün daima kün tertibinde bulundırmaq kerek olğanını izaatladılar.
Tedbirni teşkil etken, vaqtınca işğal etilgen Qırım Muhtar Cumhuriyetini ve Aqyar şeerini işğalden azat etüv ve ğayrıdan integratsiya etüv meselelerine, vaqtınca işğal etilgen topraqlarda yaşamağa devam etken, ya da Qırımdan köçip, başqa Ukraina regionlarında bulunğan Ukraina vatandaşlarını qorçalav meselelerine diqqat ayırğan ve Ukrainada siyasiy tasil meselelerine Qırım mevzusını qoşqan Ukrain siyasiy studiyalar mektebine minnetdarlığımıznı bildiremiz.