Hatırlatamız ki, Ukraina Nazirler Şurası 2020 senesi ilk qış ayınıñ 9-da qabul etken”SARS-CoV-2 tacmarazı sebebinden COVİD-19 keskin respirator hastalığınıñ Ukraina topraqlarında darqaluvına qarşılıq kösterüv maqsadınen karantin tedbirini ilân etüv ve epidemiyağa qarşı sıñırlayıcı tedbirlerni amelge keçirüv aqqında” 1236 sanlı qararnamesine kirsetilgen deñişmeler 2021 senesi arman ayınıñ 5-de amelge keçirildi, neticede vaqtınca işğal etilgen Qırım Muhtar Cumhuriyeti ve Aqyar şeeri topraqları ile memuriy sıñırda yerleşken kiriş-çıqış nezaret etüv noqtalarnı keçiş qaideleri deñişti.

Böyleliknen, vaqtınca işğal etilgen Qırım Muhtar Cumhuriyeti ve Aqyar şeeri topraqlarından kelip çıqqan vatandaşlarnıñ KÇNN-dan keçüvlerinden 72 saat keçken soñ 10 künlük öz-özüni etraf müitten ayıruv başlanacaq.

Aynı vaqıtta, öz-özüni etraf müitten ayıruv aşağıdaki şahıslardan talap etilmey:

– 18 yaşını toldurmağan balalar;

– tışqı mustaqil baalavnıñ iştirakçileri;

– devlet akimiyeti organlarınıñ vekâletleri tolu şekilde yerine ketirilgen topraqlarda yerleşken oquv yurtlarına ve şu cümleden devlet aliy oquv yurtlarına azırlağan kurslarğa (bölüklerge) kirmege niyetlengen şahıslar;

– devlet akimiyeti organlarınıñ vekâletleri tolu şekilde yerine ketirilgen topraqlarda yerleşken oquv yurtlarında oquğan şahıslar;

– ekinci-dörtünci maddede qayd etilgen şahıslarnıñ anası ya da babası (olarnı evlâtlıqqa alğan kişi), vasiyi, ya da başqa qanuniy temsilcilsi, ya da anası, babası (olarnı evlâtlıqqa alğan kişi), vasiy tarafından berilgen vekâletname esasında işbu şahıslarnıñ yanında bulunğan birisi;

– devlet akimiyeti organlarınıñ vekâletleri tolu şekilde yerine ketirilgen topraqlarda COVID-19 hastalığına qarşı aşılama almağa istegen ve yanında unikal nomerli mahsus davetname bulunğan Ukraina vatandaşları;

– tolu aşılama kursını alğanına dair vesiqası, halqara, içki sertifikatı, yada ecnebiy sertifikatı olğan şahıslar;

– Bütündünya sağlıq saqlav teşkilâtı tarafından fevqulâde vaziyetlerde qullanılması ruhset etilgen aşılamalar cedveline kirgen bir-de-bir COVID-19 aşılamasınıñ birinci sançuvını alğanlarına dair Ukraina sağlıq saqlav Nazirligi tarafından belgilengen tertipke köre berilgen malümat kâğıdı olğan şahıslar.

Bundan ğayrı, vaqtınca işğal etilgen Qırımdan kelip, kiriş-çıqış nezaret etüv noqtalarını keçken soñ COVİD-19  koronavirusnıñ antigenini belgilegen bedava ekspress testi ya da PLR usulınen yapılğan testi menfiy netice bergen şahıslar da öz-özüni etraf müitten ayıruvdan ya da observatsiyadan azat etile.

Herson vilâyeti devlet memüriyetindeki sağlıq saqlav Departamentiniñ malümatlarına köre, COVID-19 testlerini yapqan noqtalar ”Çonğar” ve ”Qalançaq” KÇNN-da bazarertesi kününden cuma kününece saat 9:00-dan 15:00-kece, başqa vaqıtta, bayram ve raatlıq künlerinde – ”Qalançaq merkeziy rayon hastahanesiniñ” qabul etüv bölüginde çalışa.

Qosma olaraq haber etemiz ki, aves etken er kes COVID-19 qarşı aşılamanı aşılav merkezlerinde yapa bile, olarnıñ bulunğan yerleri aqqında aktual malümat bu yerdedir: https://list.covid19.gov.ua