İşğal etilgen Qırım Muhtar Cumhuriyeti ve Aqyar şeeri topraqlarında RF-nıñ Ukrainağa qarşı gibrid tecavuzına müim qarşılıq kösterüv yönelişlerinden biri olaraq, Ukraina Prezidentiniñ Qırım Muhtar Cumhuriyetindeki Temsilciligi  sözde ”rus dünyasını” ”medeniy” vastalarnen rağbetleştirmek maqsadınen yarımadamıznıñ rusiyeli artistler tarafından ziyaret etilmesine muntazam surette qıymet kese.

Temsilcilik vaqtınca işğal etilgen Qırımda kinolar çıqarğan, kontsertler icra etken, tear temaşalarını numayış etken artistler, yırcılar ve taqımlar aqqında bir sene içinde toqlanğan vesiqalı malümatnıñ milliy havfsızlığımız içün telüke yaratqan şahıslar Cedveline kirsetilmesi içün Ukraina çetel işler Nazirligine, Ukraina medeniyet ve haber siyaseti Nazirligine, televizion ve radioyayınlav meseleleri boyunca Milliy şurağa, Ukraina havfsızlıq Hızmetine taqdim etti.

Bundan ğayrı, Temsilcilik işğalci memuriyet tarafından Qırım Muhtar Cumhuriyeti ve Aqyar şeeri topraqlarınıñ vaqtınca işğal etilüvini qanunlaştırmaq maqsadınen teşkil etilgen tedbirlerni muntazam tarzda nezaret etip, mütenasip merkeziy icra akimiyet organlarını bu aqta haberdar ete.

Açıq menbalarda bulunğan fotoresim. Temsilcilikniñ Aqmescit şeerindeki binası